ថ្លែងក្នុងសន្និសីទសារព័ត៌មាន កាលពីថ្ងៃទី១០ ខែកក្កដា ឆ្នាំ២០២៦ នៅស្ថានទូតបារាំងប្រចាំនៅរាជធានីភ្នំពេញ លោក នីកូឡា ហ្វ័ររីស្យេ បានគូសបញ្ជាក់ថា ប្រទេសបារំាង បានគាំទ្រការសម្រេចបាន នូវកិច្ចព្រមព្រៀងបទឈប់បាញ់រវាងកម្ពុជា-ថៃ ដែលបានចុះហត្ថលេខា កាលពីថ្ងៃទី២៧ ខែធ្នូ ឆ្នាំ ២០២៥ កន្លងទៅ។

លោកថា ប្រទេសបារាំង ក៏គាំទ្រប្រទេសទាំងពីរ ក្នុងការស្វែងរកដំណោះស្រាយដោយសន្តិភាព ហើយប្រទេសបារាំង ក៏ជូនឯកសារបណ្ណាសារ ដែលបារាំងត្រៀមដាក់ជូន ទៅប្រទេសទាំងពីរ ទាក់ទងនឹងគំរូព្រំដែន។

លើសពីនេះ ប្រទេសបារាំងប្តេជ្ញាចិត្តចំពោះជំហររបស់ខ្លួននៅទីនេះ ដើម្បីជួយប្រទេសទាំងពីរ ក្នុងការស្វែងរកដំណោះស្រាយបញ្ហាជម្លោះព្រំដែនដោយសន្តិភាព ដោយយោគយល់គ្នា និងមានការពិភាក្សាគ្នា ហើយបារាំងជំរុញឱ្យប្រទេសទាំងពីរ ត្រូវស្វែងរកកិច្ចពិភាក្សាគ្នាតាមបែបការទូត ដូច្នេះ ប្រទេសបារាំងមិនលូកដៃចូលទៅក្នុងជម្លោះនោះទេ ប៉ុន្តែបារាំងនឹងបើកទូលាយដើម្បីជួយគាំទ្របន្ថែម។

គួរបញ្ជាក់ថា បើគ្មានអ្វីប្រែប្រួល ឯកឧត្តម អេម៉ានុយអែល ម៉ាក្រុង ប្រធានាធិបតីនៃសាធារណរដ្ឋបារាំង នឹងមកកាន់ប្រទេសកម្ពុជា​ នៅខែវិច្ឆិកា ឆ្នាំ២០២៦ ៕