ក្នុងឱកាសនេះ បវរកញ្ញាស្រី សុគា គីមលាង នឹងនាំយកសម្បត្ដិវប្បធម៌ និងប្រទេសកម្ពុជាឱ្យល្បីនៅលើឆាកអន្ដរជាតិ ដើម្បីបង្ហាញអន្ដរជាតិបានស្គាល់ថា កម្ពុជាជាប្រទេសតូច តែមានបេះដូងធំ។ ក្នុងកិច្ចសម្ភាសន៍ជាមអ្នកសារព័ត៌មាន ក្នុងពិធីប្រកាសគ្រងតំណែងជា Miss International Cambodia ២០២៦ ជាផ្លូវការ ដើម្បីបន្តវេនពីបវរកញ្ញាឆ្នាំចាស់ ២០២៥ កញ្ញា សូ ពេជ្រវលក្ខ ក្នុងការតំណាងឱ្យព្រះរាជាណាចក្រកម្ពុជា ទៅប្រកួតបន្តលើឆាកអន្តរជាតិ បវរកញ្ញា សុគា គីមលាង ហៅ កូនអាន បានឱ្យដឹងថា ការប្រគួតបវរកញ្ញានៅប្រទេសជប៉ុននៅខែវិច្ឆិការ ឆ្នាំ២០២៦ខាងមុខនេះ កញ្ញានឹងនាំយកសម្បត្ដិវប្បធម៌ ប្រទេសកម្ពុជាឱ្យ ពិភពលោកទាំងអស់បានស្គាល់ ដើម្បីបង្ហាញនូវអ្វីដែលកម្ពុជាមាន និងសម្បត្ដិវប្បធម៌របស់ដូនតាខ្មែរមាន។

បវរកញ្ញាកូនអានបានបគូសបញ្ជាក់ថា ការនាំឱ្យកម្ពុជាឱ្យពិភពលោកបានស្គាល់នេះ គឺជាមោទនភាពនៃប្រជាពលរដ្ឋកម្ពុជាទាំងមូលផងដែរ។

ជាមួគ្នានេះ បវរកញ្ញាកូនអាន ក៏បានអំពាវនាវឱ្យប្រជាពលរដ្ឋកម្ពុជាសូមចូលរួមគាំទ្រកញ្ញាឱ្យបានកាន់តែច្រើន ដើម្បីលើកទឹកចិត្ដ ដើម្បីជំរុញសមត្ថភាពនារីខ្មែរ មានឱកាសបញ្ចេញសមត្ថភាពកាន់តែខ្លាំងនៅលើឆាកអន្តរជាតិ។

ទន្ទឹមនឹងការទទួលបានមកុដនេះ សារលិខិតអបអរសាទរ និងពាក្យពេចន៍ជូនពរជាច្រើនពីមហាជន បានបួងសួងឱ្យ កញ្ញា សុគា គីមលាង ទទួលបាននូវភាពជោគជ័យដ៏ត្រចះត្រចង់។ សូមឱ្យដំណើរឆ្ពោះទៅកាន់ឆាកអន្តរជាតិមួយនេះ ពោរពេញទៅដោយភាពជឿជាក់ ក្តីថ្លៃថ្នូរ ស្រស់សោភា និងនាំយកមកវិញនូវសមិទ្ធផលដ៏អស្ចារ្យជូនជាតិមាតុភូមិ។

គួរបញ្ជាក់ផងដែរថា កម្មវិធីគ្រងមកុដជាផ្លូវការ (Crowning Ceremony) របស់ Miss International Cambodia 2026 នឹងត្រូវប្រារព្ធឡើងយ៉ាងឱឡារិក នាល្ងាចថ្ងៃទី ៩ ខែកក្កដា ឆ្នាំ២០២៦ នេះ ដោយមានការចូលរួមពីភ្ញៀវកិត្តិយសជាតិ និងអន្តរជាតិល្បីៗជាច្រើនរូប នៅទីតាំងសណ្ឋាគារផ្កាយ៥ Sun & Moon, Riverside ៕