ប្រាប់អ្នកសារព័ត៌មានក្នុងសន្និសីទសារព័ត៌មាន កាលពីថ្ងៃទី២០ ខែមីនា ឆ្នាំ២០២៥ អ្នកឧកញ៉ា ឡេង ណាវ៉ាត្រា អគ្គនាយកក្រុមហ៊ុន ហ្គាឡាក់ស៊ីណាវ៉ាត្រា គ្រុប បានលើកឡើងថា អមជាមួយវណ្ណកម្មដ៏ថ្លៃថ្លានៃខ្សែភាពយន្តភាគខ្នាតធំ និងស្របតាមការចង្អុលបង្ហាញដ៏ខ្ពង់ខ្ពស់របស់សម្តេចតេជោ ហ៊ុន សែន , ផលិតកម្ម Galaxy Navatra បានទទួលសិទ្ធិដើម្បីផលិតជា Albums ចម្រៀងផ្លូវការរឿង «កូនប្រុសក្រោមពន្លឺព្រះចន្ទពេញបូណ៌មី» ជាជំហានដំបូង ដោយក្នុង ១ Album នឹងមានប្រហែលចន្លោះពី ៨ Vol. ទៅ១០Vol. ដែលក្នុង Vol. នីមួយៗ នឹងមាន១០បទ។ ជាសរុបប្រហែលចន្លោះពី៨០បទ ទៅ១០០បទ ក្នុងមួយ Album។ សរុប២Albums ទាំងបទលំនាំបទដើម និងមេឡូឌីថ្មី ប្រហែលជាជិត២០០បទ។

អ្នកឧកញ៉ាបញ្ជាក់ថា «នេះជាកិត្តិយសដ៏ធំធេងណាស់ សម្រាប់ការងារប្រវត្តិសាស្រ្តក្នុងការផលិតកម្រងចម្រៀងជូនសម្តេចទាំងទ្វេ ដើម្បីទុកជាមរតកដល់អ្នកជំនាន់ក្រោយបានដឹង និងឈ្វេងយល់ពីដំណើររឿង ដោយសាររឿងនេះ ជាដំណាក់កាលប្រវត្តិសាស្ត្រ និងជារឿងពិតដែលនិយាយពីសាច់រឿងរបស់សម្តេចតេជោ ក្នុងកំឡុងពេលចូលព្រៃ ហើយធ្វើការតស៊ូនឹងស្វែងរកការផ្សះផ្សារនាំសុខសន្តិភាពជូនជាតិមាតុភូមិ»៕