លោក ជា ធីរិទ្ធ អ្នកនាំពាក្យ សម្ដេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា និងជាប្រធានព្រឹទ្ធសភានៃកម្ពុជា នៅរសៀលថ្ងៃទី១៩ ខែមិថុនា ឆ្នាំ២០២៥នេះ បានត្រឹមអស់សំណើច ចំពោះអ្នកនាំពាក្យក្រសួងការបរទេសថៃនៅពេលនិយាយចោទប្រកាន់សម្ដេចតេជោ និងប្រទេសកម្ពុជាដោយភាពក្មេងខ្ចី និងគ្មានហេតុផល និងចោទសួរថា តើនរណាគេជាអ្នកបំផ្លាញទំនាក់ទំនងទ្វេភាគីរវាងប្រទេសទាំងពីរ ខណៈថៃបានបាញ់ទាហានកម្ពុជាស្លាប់, បិទព្រំដែនដោយឯកតោភាគី។

លោក ជា ធីរិទ្ធ ថ្លែងថា ខ្ញុំគិតថា វាជារឿងគួរឱ្យអស់សំណើចទៅវិញទេ នៅពេលដែលអ្នកនាំពាក្យក្រសួងការបរទេសថៃនិយាយម្ដងៗ ចោទប្រកាន់សម្ដេចតេជោ ហើយហ៊ាន ហាមាត់ទៅរួចថា សំឡេងសម្ដេចតេជោ គឺប៉ះពាល់ដល់ក្រមសីលធម៌ការទូត និងបំផ្លាញទំនាក់ទំនងទ្វេភាគីរវាងថៃជាអ្នកជិតខាងនឹងគ្នា។ 

លោកបានចោទសួរត្រលប់ទៅអ្នកនាំពាក្យក្រសួងការបទេសថៃវិញថា៖ ថៃ នរណាគេបាញ់សម្លាប់ទាហានខ្មែរកាលពីថ្ងៃទី ២៨ ខែឧសភា? ថៃ តើនរណាគេជាអ្នកបិទព្រំដែនជាឯកតោភាគី? ថៃ តើអាហ្នុងឬជាក្រមសីលធម៌ការទូត? តើហ្នុងឬមិនមែនជាសកម្មភាពដែលរំលោភក្រមសីលធម៌ការទូត?  លោកបន្តចោទសួរទៅភាគីថៃថា តើនរណាគេជាអ្នកបំផ្លាញទំនាក់ទំនងទ្វេភាគីរវាងប្រទេសទាំងពីរ ខណៈថៃបានបាញ់ទាហានកម្ពុជាស្លាប់, បិទព្រំដែនដោយឯកតោភាគី, តើអាហ្នុងឬជាសកម្មភាពពូនជ្រំទំនាក់ទំនងប្រទេសទាំងពីរ? ប៉ុន្ដែវាជាសកម្មភាពបំផ្លាញទំនាក់ទំនង! តើនរណាគេជាអ្នកធ្វើមុនឱ្យពិតប្រាកដ?៕