|
ក្រសួងព័ត៌មាន ហាមទូរទស្សន៍របស់កម្ពុជា ចាក់ផ្សាយរឿងថៃ ក្រោយសម្ដេចតេជោ ហ៊ុន សែន ប្រកាសកណ្ដាលយប់
ថ្ងៃទី ៖ 12-06-2025, ដោយ Admin , 23 Views
ភ្នំពេញ : ក្រសួងព័ត៌មានមាន បានចេញសេចក្ដីជូនដំណឹងបន្ទាន់មួយដោយហាមទូរទស្សន៍ទាំងអស់របស់កម្ពុជា បន្តចាក់ផ្សាយរឿងថៃ ។ បម្រាមនេះបានធ្វើបន្ទាន់ ក្រោយពីសម្ដេចតេជោ ហ៊ុន សែន ប្រធានព្រឹទ្ធសភាកម្ពុជា ប្រកាសទាំងកណ្ដាលយប់មិនឱ្យចាក់រឿងថៃតទៅទៀត ខណៈភាគីថៃបានគម្រាមកម្ពុជា ម្ដងជាពីរដង ។
បើតាមក្រសួងព័ត៌មាន កាលពីយប់ថ្ងៃទី១២ មិថុនា ក្រសួងព័ត៌មានមានកិត្តិយសសូមជម្រាបជូនដំណឹងដល់លោកអ្នកឧកញ៉ា អ្នកឧកញ៉ា ឧកញ៉ា លោកជំទាវ លោក លោកស្រីដែលជាម្ចាស់ស្ថានីយទូរទស្សន៍ទាំងអស់មេត្តាជ្រាបថា ចាប់ពីម៉ោង ១២ យប់ ថ្ងៃទី១២ ខែមិថុនា ឆ្នាំ២០២៥ នេះតទៅ
សូមស្ថានីយទូរទស្សន៍ទាំងអស់នៅកម្ពុជា បញ្ឈប់ការចាក់ផ្សាយខ្សែភាពយន្តថៃគ្រប់ប្រភេទនៅលើកញ្ចក់ទូរទស្សន៍របស់ខ្លួន។ អាស្រ័យដូចបានជម្រាបជូនខាងលើ សូមលោកអ្នកឧកញ៉ា អ្នកឧកញ៉ា ឧកញា លោកជំទាវ លោក លោកស្រីដែលជាម្ចាស់ស្ថានីយទូរទស្សន៍ទាំងអស់ចូលរួមអនុវត្តដោយស្មារតីទទួលខុសត្រូវខ្ពស់៕
|