ក្នុងរង្វង់ប្រតិបត្តិការទីតាំងទី១ គឺនៅថ្ងៃទី០៧ ខែមិថុនា ឆ្នាំ២០២៥ កម្លាំងមន្ទីរស្រាវជ្រាវ និងបង្ក្រាបទល្មើសសហការជាមួយកម្លាំងមូលដ្ឋានកងរាជអាវុធហត្ថស្រុកភ្នំស្រួច និងកម្លាំងកងរាជអាវុធហត្ថស្នាក់ការសន្តិសុខវាលធំ ដឹកនាំដោយ លោកវរសេនីយ៍ទោ ណុល ដារ៉ា ប្រធានមន្ទីរស្រាវជ្រាវ និងបង្ក្រាបទល្មើស បានធ្វើការបង្ក្រាបជាក់ស្តែង និងឃាត់ខ្លួនជនសង្ស័យ ចំនួន០១នាក់ ដែលជាប់ពាក់ព័ន្ធករណី គ្រឿងញៀន នៅចំណុចផ្ទះខ្ទមដីឡូក្នុងចំការស្វាយ ស្ថិតនៅភូមិវាលធំ ឃុំយាយម៉ៅពេជ្រនិល ស្រុកភ្នំស្រួច ខេត្តកំពង់ស្ពឺ ។ ជនសង្ស័យមានឈ្មោះ ញឹម ចំរើន ភេទប្រុស អាយុ៤០ឆ្នាំ ទីលំនៅបច្ចុប្បន្នភូមិវាលធំ ឃុំយាយម៉ៅពេជ្រនិល ស្រុកភ្នំស្រួច ខេត្តកំពង់ស្ពឺ និងចាប់យកវត្ថុតាងបានរួមមាន ៖ ក្រាមពណ៌សថ្លា ចំនួន១៥កញ្ចប់ ទម្ងន់៨៤.៥៦ក្រាម (ថ្លឹងទងសំបក), ទូរស័ព្ទ ចំនួន០២គ្រឿង, ជញ្ជីងថ្លឹងគ្រឿងញៀន ចំនួន០១គ្រឿង, ដាវ ចំនួន០១ដើម, ម៉ូតូ ចំនួន០១គ្រឿង, សម្ភារៈប្រើប្រាស់គ្រឿងញៀនមួយចំនួន, គ្រាប់កាំភ្លើងបាញ់ខ្យល់ (គ្រាប់កង់) ចំនួន០៤គ្រាប់ និងថង់ដៃពណ៍ក្រហមសម្រាប់ដាក់គ្រឿងញៀន ។

ក្នុងរង្វង់ប្រតិបត្តិការទីតាំងទី២ គឺនៅថ្ងៃទី០៨ ខែមិថុនា ឆ្នាំ២០២៥ កម្លាំងមន្ទីរស្រាវជ្រាវ និងបង្ក្រាបទល្មើស សហការជាមួយកម្លាំងមូលដ្ឋានកងរាជអាវុធហត្ថស្រុកភ្នំស្រួច និងកម្លាំងកងរាជអាវុធហត្ថស្នាក់ការសន្តិសុខវាលធំ ដឹកនាំដោយ លោកវរសេនីយ៍ទោ ណុល ដារ៉ា ប្រធានមន្ទីរស្រាវជ្រាវ និងបង្ក្រាបទល្មើស បានធ្វើការបង្ក្រាបជាក់ស្តែង និងឃាត់ខ្លួនជនសង្ស័យ ចំនួន០១នាក់ ដែលជាប់ពាក់ព័ន្ធករណី គ្រឿងញៀន ចំណុចគល់ស្ពានអូរចោទ លើផ្លូវលេខ៣១៧ ស្ថិតនៅភូមិទី៦ ឃុំយាយម៉ៅពេជ្រនិល ស្រុកភ្នំស្រួច ខេត្តកំពង់ស្ពឺ ។ ជនសង្ស័យមានឈ្មោះ កែវ ពេជ្រស្រីតី ហៅ គីម ភេទស្រី អាយុ៤៥ឆ្នាំ មានទីលំនៅបច្ចុប្បន្នភូមិគោកឃ្លាង សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ។

ចាប់យកវត្ថុតាងបានរួមមាន ៖ ក្រាមពណ៌សថ្លា ចំនួន០២កញ្ចប់ ទម្ងន់២០៣.៣៤ក្រាម (ថ្លឹងទងសំបក), ទូរស័ព្ទ ចំនួន០៣គ្រឿង, ប្រាក់រៀល ចំនួន ៣១០.០០០រៀល, ប្រាក់ដុល្លារ ចំនួន ៣០ដុល្លារ, ជញ្ជៀនលោហ:ធាតុពណ៍ស ចំនួន០២វង់, ខ្សែកលោហ:ធាតុពណ៍ស ចំនួន០១ខ្សែ, នាឡិការដៃ ចំនួន០១គ្រឿង, ក្រវិល ចំនួន០១ខាង ។

បន្ទាប់មកទៀតកម្លាំងជំនាញស្នើសុំពន្លៀតដែនដីសមត្ថកិច្ចពីខេត្តកំពង់ស្ពឺ ទៅរាជធានីភ្នំពេញ នៅវេលាម៉ោង ១២:០៥នាទី ថ្ងៃទី០៩ ខែមិថុនា ឆ្នាំ២០២៥ កម្លាំងមន្ទីរស្រាវជ្រាវ និងបង្រ្កាបបទល្មើស បញ្ជាការដ្ឋានកងរាជអាវុធហត្ថខេត្តកំពង់ស្ពឺ សហការជាមួយការិយាល័យប្រឆាំងគ្រឿងញៀន បញ្ជាការដ្ឋានកងរាជអាវុធហត្ថលើផ្ទៃប្រទេស និងការិយាល័យប្រឆាំងគ្រឿងញៀន បញ្ជាការដ្ឋានកងរាជអាវុធហត្ថរាជធានីភ្នំពេញ និងមូលដ្ឋានកងរាជអាវុធហត្ថខណ្ឌសែនសុខ បានឃាត់ខ្លួនជនសង្ស័យ ចំនួន០១នាក់ទៀត នៅចំណុចក្នុងផ្ទះរបស់ឈ្មោះ កែវ ពេជ្រស្រីតី ហៅ គីម ភូមិគោកឃ្លាង សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ មានជនសង្ស័យឈ្មោះ ឃុន មនោថៃ ភេទប្រុស អាយុ៣៩ឆ្នាំ មុខរបររត់កង់បី និងចាប់យកវត្ថុតាងបានរួមមាន ៖ ក្រាមពណ៌ស ចំនួន០២កញ្ចប់, ជញ្ជីងថ្លឹងអេឡិចត្រូនិក ចំនួន០១គ្រឿង, ម៉ូតូកង់បី ចំនួន០១គ្រឿង, ទូរស័ព្ទ ចំនួន០១គ្រឿង (ម៉ាក oppo), សម្ភារ:សម្រាប់ប្រើប្រាស់គ្រឿងញៀន (ដបជក់)។

នៅវេលាម៉ោង ១៥:១០នាទី ថ្ងៃ.ខែ.ឆ្នាំដដែលនោះ កម្លាំងមន្ទីរស្រាវជ្រាវ និងបង្រ្កាបបទល្មើស បញ្ជាការដ្ឋានកងរាជអាវុធហត្ថខេត្តកំពង់ស្ពឺ សហការជាមួយការិយាល័យប្រឆាំងគ្រឿងញៀន បញ្ជាការដ្ឋានកងរាជអាវុធហត្ថលើផ្ទៃប្រទេស ការិយាល័យប្រឆាំងគ្រឿងញៀន បញ្ជាការដ្ឋានកងរាជអាវុធហត្ថរាជធានីភ្នំពេញ និងមូលដ្ឋានកងរាជអាវុធហត្ថខណ្ឌ៧មករា បានធ្វើការឃាត់ខ្លួនជនសង្ស័យ ចំនួន០១នាក់បន្ថែមទៀត ស្ថិតនៅចំណុចបន្ទប់ជួលផ្ទះលេខ៣២ ផ្លូវលេខ១០៩ ស្ថិតនៅភូមិទី២ សង្កាត់មនោរម្យ ខណ្ឌ៧មករា រាជធានីភ្នំពេញ ដោយជនសង្ស័យមានឈ្មោះ វែន សុខចំរុង ភេទប្រុស អាយុ ៣៧ឆ្នាំ ។

សូមបញ្ជាក់ផងដែរថា បច្ចុប្បន្នជនសង្ស័យ រួមទាំងវត្ថុតាងត្រូវបានកម្លាំងជំនាញមន្ទីរស្រាវជ្រាវ និងបង្រ្កាបបទល្មើស បញ្ជាការដ្ឋានកងរាជអាវុធហត្ថខេត្តកំពង់ស្ពឺ កសាងសំណុំរឿងបញ្ជូទៅសាលាដំបូងខេត្តកំពង់ស្ពឺ ដើម្បីចាត់ការតាមនីតិវិធី ៕