ចោរគាស់ផ្ទះជំនាញម្នាក់ ត្រូវអស់លក្ខមកជាប់ខ្នោះអាវុធហត្ថរាជធានីភ្នំពេញ
ថ្ងៃទី ៖ 19-07-2024, ដោយ Dara007 , 72 Views
ភ្នំពេញៈ ចោរម្នាក់ ធ្លាប់ធ្វើសកម្មភាពគាស់ផ្ទះជាច្រើនលើក ត្រូវបានអាវុធហត្ថរាជធានីភ្នំពេញ ឃាត់ខ្លួនបញ្ជូនទៅតុលាការ បន្ទាប់ប្រជាពលរដ្ឋស្រែកឆោឡោថាចោរៗ ក៏បានឃើញជនសង្ស័យរត់ផ្លោះរបងពីផ្ទះមួយទៅផ្ទះមួយ ពេលនោះកម្លាំងល្បាតអាវុធហត្ថខណ្ឌទួលគោក បានដេញប្រផាប់ចាប់ប្រភីង រហូតឃាត់ខ្លួនជនសង្ស័យ០១នាក់ ឈ្មោះ គង់ ពិសី ភេទប្រុស អាយុ៣១ឆ្នាំ យកមកធ្វើការសាកសួរ និងចាត់ការតាមផ្លូវច្បាប់។
ជនសង្ស័យឈ្មោះ គង់ ពិសី បានសារភាពថា ខ្លួនពិតជាបានធ្វើសកម្មភាពលួចគាស់ផ្ទះវិឡាមួយកន្លែងដែលគេទុកចោល នៅចំណុចខាងលើ តែម្នាក់ឯង ពិតប្រាកដមែន ដើម្បីលួចយកដែក និងខ្សែភ្លើង ស្រាប់តែមានប្រជាពលរដ្ឋបានឃើញ ក៏ស្រែកថាចោរៗ ធ្វើឲ្យខ្លួនមានការភិតភ័យក៏រត់លោតផ្លោះរបងទៅផ្ទះវីឡារបស់គេមួយទៀតនៅជិតនោះ ស្រាប់តែមានកម្លាំងសមត្ថកិច្ចអាវុធហត្ថដែលកំពុងល្បាតជិតនោះ ចុះមកដល់ធ្វើការចាប់រូបខ្លួនភ្លាមៗតែម្តង។
ជនសង្ស័យបានបញ្ជាក់ថា កន្លងមក ខ្លួនធ្លាប់គាស់ផ្ទះរបស់អ្នកដទៃលួចយកទ្រព្យសម្បត្តិ និងសម្ភារៈផ្សេងៗ ជាច្រើនលើក និង ធ្លាប់ជាប់មណ្ឌលកែប្រែបន្សាបសារធាតុញៀនចំនួន០២លើក ផងដែរ ។
បច្ចុប្បន្នជនសង្ស័យ ត្រូវបានកម្លាំងជំនាញការិយាល័យប្រឆាំងបទល្មើសព្រហ្មទណ្ឌ នៃកងរាជអាវុធហត្ថរាជធានីភ្នំពេញ កសាងសុំណុំរឿងបញ្ជូនទៅតុលាការ ដើម្បីចាត់ការតាមនីតិវិធីច្បាប់៕
|