ប្រតិបត្តិការនេះ បានធ្វើឡើងក្រោមការបញ្ជាផ្ទាល់ពីលោក អ៊ុំ រាត្រី ប្រធានគណៈបញ្ជាការឯកភាពខេត្ត និងក្រោមការសម្របសម្រួលនីតិវិធីពីលោក កើត វណ្ណារ៉េត ព្រះរាជអាជ្ញាអមសាលាដំបូងខេត្ត។

រដ្ឋបាលខេត្តបន្ទាយមានជ័យ គូសបញ្ជាក់ថា ថ្ងៃទី២៨ ខែមិថុនា គណ:បញ្ជាការឯកភាពរដ្ឋបាលខេត្តដឹកនាំដោយលោក ប្រាក់ ប៉ូលី អភិបាលរងខេត្ត ក្រោមការសម្របសម្រួលនីតិវិធីពីលោក សំរឹទ្ធ សុខុន និងលោក ទេព ឃុនឆ័យ ព្រះរាជអាជ្ញារង នៃអយ្យការអមសាលាដំបូងខេត្ត បានចុះត្រួតពិនិត្យទីតាំងចំនួន៣ ដូចខាងក្រោម៖ ទីតាំងទី១៖ ផ្ទះជួល៣ល្វែង កម្ពស់៥ជាន់ ៤៧បន្ទប់ ស្ថិតនៅភូមិក្បាលស្ពាន១ សង្កាត់អូរជ្រៅ ដោយរកឃើញជនជាតិឥណ្ឌូនេស៊ីស្នាក់នៅប្រមូលផ្ដុំចំនួន៨១នាក់។ ពួកគេបម្រើការងារនៅកាស៊ីណូហូលីដេ និងមានជនជាតិឥណ្ឌូនេស៊ីម្នាក់ ជាអ្នករក្សាទុកលិខិតឆ្លងដែនរបស់ជនជាតិឥណ្ឌូនេស៊ីទាំង៨១នាក់នោះ តែទីតាំងពុំមានសម្ភារសង្ស័យនឹងបទល្មើស Online Scams នោះឡើយ។

ជនជាតិឥណ្ឌូនេស៊ីម្នាក់ ដែលជាអ្នករក្សាទុកលិខិតឆ្លងដែនរបស់ជនជាតិឥណ្ឌូនេស៊ីទាំង៨១នាក់នោះ ត្រូវបាននាំយកទៅសាកសួរនៅអធិការដ្ឋានននគរបាលក្រុង។ ដោយឡែកម្ចាស់ទីតាំងត្រូវបានអប់រំណែនាំ និងធ្វើកិច្ចសន្យា។ ទីតាំងទី២៖ ផ្ទះ២ល្វែងកម្ពស់៤ជាន់ ស្ថិតនៅភូមិក្បាលស្ពាន១ សង្កាត់អូរជ្រៅ តែពុំមានជនបរទេសនោះឡើយ ហើយប្រគល់ឱ្យចៅសង្កាត់បន្ដស្រាវជ្រាវរកម្ចាស់ទីតាំងដើម្បីអប់រំណែនាំ និងធ្វើកិច្ចសន្យា។ ទីតាំងទី៣៖ បន្ទប់ជួល៣បន្ទប់ ស្ថិតនៅភូមិសន្ដិភាព ឃុំទួលពង្រ ស្រុកម៉ាឡៃ ដោយរកឃើញជនជាតិឥណ្ឌូនេស៊ីម្នាក់ មានសម្ភារសង្ស័យរួមមាន៖ ទូរសព្ទចំនួន ១១គ្រឿង។ វត្ថុតាងត្រូវបានដកហូត និងជនសង្ស័យត្រូវបានបញ្ជូន ទៅស្នងការដ្ឋាននគរបាលខេត្ត ដើម្បីសួរនាំចាត់ការបន្តទៀត៕