គ្រូពេទ្យ TYDA វះកាត់ដុំខ្លាញ់ធំនិងជ្រៅនៅក្រោមក្លៀកខាងស្តាំលើស្ដ្រីម្នាក់បានជោគជ័យ បន្ទាប់ពីទៅរកសេវាព្យាបាល និងវះកាត់ជាច្រើនកន្លែងតែគាត់មិនហ៊ានទទួលយកការវះកាត់
ថ្ងៃទី ៖ 18-10-2024, ដោយ Dara007 , 4 Views
ភ្នំពេញៈ សមាគមគ្រូពេទ្យស្ម័គ្រចិត្តយុវជនសម្តេចតេជោ (TYDA) បាននាំអ្នកមីង រ៉ន សុភាព អាយុ 44ឆ្នាំ ដែលមានដុំខ្លាញ់ធំនិងជ្រៅនៅក្រោមក្លៀកខាងស្តាំ។ ដុំនេះកើតឡើងរយៈពេល16ឆ្នាំមកហើយ គាត់បានទៅរកសេវាព្យាបាល និងវះកាត់ជាច្រើនកន្លែងតែគាត់មិនហ៊ានទទួលយកការវះកាត់ទេ គាត់មានអារម្មណ៌មិនផាសុខភាព និងមិនមានទំនុកចិត្ត។
មកដល់ថ្ងៃទី13 ខែតុលា ឆ្នាំ2024 ខាងសមាគមគ្រូពេទ្យយុវជនស្ម័គ្រចិត្តសម្តេចតេជោ (TYDA) បានចុះពិនិត្យ និងព្យាបាលជូនប្រជាជននៅភូមិអណ្តូង សង្កាត់ព្រែកប្រា ខ័ណ្ឌច្បារអំពៅ រាជធានីភ្នំពេញ។ អ្នកមីងបានជួបពិគ្រោះ ជាមួយខាងក្រុមគ្រូពេទ្យហើយត្រូវបានបញ្ជូនមកទទួលការវះកាត់បន្តនៅមន្ទីរសម្រាកព្យាបាលក្តីសង្ឃឹមនៃយេរេមា (JHMC) នៅថ្ងៃទី17 ខែតុលា ឆ្នាំ2024។
ក្រោយការវះកាត់ អ្នកមីងមានការសប្បាយចិត្តជាខ្លាំង ព្រមទាំងលើកម្រាមដៃដប់អរគុណទៅដល់លោកវេជ្ជបណ្ឌិត និងក្រុមការងារនៅមន្ទីរពេទ្យ ជាពិសេសគាត់សូមគោរពថ្លែងអំណរគុណដល់សម្តេចមហាបវរធិបតី ហ៊ុន ម៉ាណែត ព្រមទាំងលោកជំទាវបណ្ឌិត ពេជ ចន្ទមុន្នី ដែលលោកទាំងពីរតែងតែគិតគូដល់សុខទុក្ខរបស់ប្រជាជនកម្ពុជាទាំងអស់៕
|