ថ្លែងក្នុងឱកាសអញ្ជើញជាអធិបតីក្នុងព្រឹត្តិការណ៍ “អបអរសាទរខួប ២០ឆ្នាំ នៃកម្ពុជាចូលជាសមាជិកអង្គការពាណិជ្ជកម្មពិភពលោក” នៅសណ្ឋាគារសុខាភ្នំពេញ នៅថ្ងៃទី១៤ ខែតុលា ឆ្នាំ២០២៤នេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជាប្រកាសថា កម្ពុជាមិនគាំទ្រគោលនយោបាយប្រទេសណាមួយឬប្លុកណា ដែលដាក់ចេញឡើង ដើម្បីប្រគួតប្រជែង និងប្រឆាំងប្រទេសណាមួយនោះទេ ដែលធ្វើឱ្យធ្វើឱ្យប៉ះពាល់ដល់នយោបាយអធ្យាក្រិតរបស់កម្ពុជា។ ជាមួយគ្នានេះ សម្ដេចធិបតីបានបញ្ជាក់ថា រាជរដ្ឋាភិបាល នៅបន្ដគោលនយោបាយធ្វើសមាហរណកម្មទីផ្សារ ដែលជាប្លុក និងយន្ដការដែលមានទិសដៅរួម ដើម្បីបង្កើតឡើងរក្សាសុខុដុមរម្យនីកម្ម សុខសន្ដិភាព និងវិបុលភាពនៅក្នុងតំបន់។
សម្ដេចធិបតីបានបន្ថែមថា ការចូលរួមជាប្លុក និងយន្ដការដែលមានទិសដៅរួមនេះ ដើម្បីជំរុញការអភិវឌ្ឍរួមគ្នានៅក្នុងតំបន់ ជាពិសេសសេដ្ឋកិច្ច និងរក្សាសន្ដិភាពរួមគ្នានៅក្នុងតំបន់ ពីព្រោះកម្ពុជាត្រូវការសន្ដិភាព។
សម្ដេចធិបតីបន្ដថា សន្ដិភាពនៅក្នុងប្រទេសក៏ត្រូវថែរក្សា ប៉ុន្ដែសន្ដិភាពនៅក្នុងតំបន់ក៏ចាំបាច់ដែរ ពីព្រោះវាជាប់ពាក់ព័ន្ធកម្ពុជាផងដែរ។
សម្ដេចធិបតីបន្ដទៀតថា សម្រាប់កម្ពុជាជាសមាជិករបស់អង្គការសហប្រជាជាតិ និងជាសមាជិករបស់អាស៊ាន គឺចូលរួមក្នុងយន្ដការណាដែលបានផ្ដល់ផលប្រយោជន៍ថែរក្សា និងបំពេញឱ្យគ្នា ពិសេសជំរុញសេដ្ឋកិច្ចរួមគ្នាដោយមិនបង្កើតឡើង ដើម្បីប្រឆាំងប្រទេសណា និងប្លុកណានោះឡើយ ។