អាណាព្យាបាលជាច្រើនរូប បានសម្ដែងអារម្មណ៍រីករាយ និងគាំទ្រចំពោះសម្ដេចធិបតីដែលបានឱ្យអនុវត្ដសាលាគំរូស្ដង់ដាដំបូង ដើម្បីដាក់២ម៉ោងបន្ថែមនេះ គឺបានកែប្រែឥរិយាបថកូនៗរបស់ពួកគាត់យ៉ាងច្រើន ទាំងសីលធម៌ ក្លាហាន ចូលចិត្ដក្នុងការរៀនសូត្រ និងមានអនាម័យល្អ ។ ជាពិសេស ចេះជួយកិច្ចការការងារផ្ទះបានយ៉ាងល្អប្រសើរ។ ការសម្ដែងការក្ដីរំភើបរបស់អាណាព្យាបាលនេះ ធ្វើឡើងបន្ទាប់ពីសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា អញ្ជើញចុះពិនិត្យ និងស្ដាប់ការអនុវត្ដសកម្មភាពក្រៅផ្លូវការរបស់សម្ដេច នាព្រឹកថ្ងៃសៅរ៍ ទី២៧ កក្កដា ២០២៤នេះ។
ក្នុងន័យនេះ អាណាព្យាបាលអស់ក្ដីកង្វល់លើការអប់រំណែនាំកូនៗតទៅទៀតហើយ ខណៈដែលបានឃើញក្មេងៗជាយុវជនជាច្រើនបានភ្លើតភ្លើន និងគេចសាលាមិនចូលរៀនផងដែរ។
ក្នុងឱកាសនោះ អាណាព្យាបាលជាច្រើនរូប បានថ្លែងអំណរគុណចំពោះសម្ដេចធិបតីនាយករដ្ឋមន្រ្ដីកម្ពុជា ដែលបានបង្ហាញការយកចិត្ដទុកដាក់ជួយដល់កូនៗ និងសិស្សានុសិស្ស ដើម្បីក្លាយជាក្មេងល្អ និងជាធនធានមនុស្សសម្រាប់គ្រួសារ និងសង្គមជាតិ ។
ជាមួយគ្នានេះ សម្ដេចធិបតី ហ៊ុន ម៉ាណែត មានប្រសាសន៍ថា រាជរដ្ឋាភិបាលធ្វើអ្វីៗ ដើម្បីអនាគតកូនខ្មែរ និងបន្សល់ទុកស្នាដៃជូនពលរដ្ឋ និងសង្គមជាតិតែប៉ុណ្ណោះសម្រាប់ធ្វើឱ្យប្រជាពលរដ្ឋរស់នៅមានសុខុមរមនីកម្មសង្គមជាតិតែមួយ។
សម្ដេចធិបតីបានបញ្ជាក់ថា ការបង្កើតឱ្យមានសាលាគំរូស្ដងដានាពេលនេះ គឺចង់ឃើញសិស្សានុសិស្សទាំងអស់ទទួលបានការអប់រំ មានសីលធម៌ និងរស់នៅមានអនាម័យ ដើម្បីក្លាយជាធនធានមនុស្សដ៏មានសក្ដានុពលសម្រាប់ខ្លួនឯង គ្រួសារ និងសង្គមជាតិ។ ជាពិសេស ជាគ្រឹះឱ្យសិស្សរៀននៅបឋមសិក្សាត្រូវចេះអក្សរខ្មែរ និងគណិតវិទ្យាឱ្យបានច្បាស់លាស់ជាងភាសារបរទេស ដើម្បីអាចឡើងទៅរៀននៅអនុ និងវិទ្យាល័យ។
សម្តេចធិបតីបន្ថែមថា យើងនឹងយកគំរូនៅសាលាតាមស្ដង់ដាដំបូងនេះ ទៅអនុវត្ដនៅតាមសាលាផ្សេងទៀតនៅទូទាំងប្រទេសនាពេលខាងមុខ ដែលមានជាង ៧ពាន់សាលា នាពេលខាងមុខ។
សម្ដេចធិបតី ក៏បានសម្ដែងការរីករាយ និងអរគុណចំពោះការចូលរួមរបស់ឪពុកម្ដាយ បន្ទាប់ពីការតភ្ជាប់រវាងឪពុកម្ដាយ និងលោកគ្រូអ្នកគ្រូ គឺជាកិច្ចការល្អ ដើម្បីពង្រឹងអប់រំកូនៗ ជាមួយសាលាផងដែរ៕