ថ្លែងក្នុងឱកាសអញ្ជើញជាអធិបតីក្នុងពិធីបញ្ចុះបឋមសិលាសាងសង់សារមន្ទីរ សម្ដេចព្រះព្រហ្មរតនមុនី ពិន សែម ក្នុងបរិវេណវត្តរាជបូណ៌ ស្ថិតនៅសង្កាត់សាលាកំរើក ក្រុងសៀមរាប ខេត្តសៀមរាប នៅព្រឹកថ្ងៃទី១៨ ខែកក្កដា ឆ្នាំ២០២៤នេះ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃព្រះរាជាណាចក្រកម្ពុជា បានណែនាំឱ្យលោកស្រី ជា សិរី ប្រធានធនាគារជាតិពិនិត្យលើការដូរប្រាក់ដុល្លារជាបន្ទាន់ ក្នុងករណីលុយដុល្លារចាស់ ឬដាច់បន្ដិចបន្តួច ដែលប្រជាពលរដ្ឋ និងភ្ញៀវទេសចរ ពិបាកចាយ ឬដូរត្រូវខាតទឹក។

សម្ដេចធិបតីបានប្រាប់ឱ្យធនាគារជាតិទម្លាក់លក្ខខណ្ឌមួយចំនួនចំពោះការចាយវាយក្រដាសប្រាក់ដុល្លារ ដែលមានភាពទក់ ឬមានស្នាមតិចតួច ដើម្បីផ្តល់ភាពងាយស្រួលដល់ការចាយវាយរបស់ភ្ញៀវទេសចរ បន្ទាប់ពីសម្ដេចធិបតីចុះមើល និងស្ដាប់សំណូមពររបស់បងប្អូន Pub Street នៅខេត្តសៀមរាប បានង្ហាញកង្វល់នេះ។

ទន្ទឹមនឹងនេះ សម្តេចធិបតី បានបញ្ជាក់ថា គោលដៅរបសរាជរដ្ឋាភិបាល គឺត្រូវធ្វើយ៉ាងណាបង្កការងាយស្រួលដល់ភ្ញៀវទេសចរបរទេស ដើម្បីជួយទាកទាញវិស័យទេសចរណ៍ ដោយត្រូវទទួលបដិសណ្ឋារកិច្ចឲ្យបានល្អបំផុត៕