ថ្លែងក្នុងឱកាសអញ្ជើញជាអធិបតីភាពក្នុងពិធីសម្ពោធឆ្លង ព្រះបទុមចេតិយ និងសមិទ្ធផលនានានៅវត្ត មណី រតនារាម ស្ថិតក្នុងសង្កាត់រលាប ក្រុងពោធិ៍សាត់ ខេត្តពោធិ៍សាត់ នៅ ថ្ងៃទី៣១ ខែមីនា ឆ្នាំ២០២៤នេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា នឹងពិនិត្យឡើងវិញ ចំពោះការដាក់អភិបាលស្រុក ខណ្ឌ ពីព្រោះថា មុខព្រួយក្ដៅ គឺត្រូវការមេទ័ពខ្លាំង ដើម្បីធានាថា កន្លែងណាក្ដៅ ត្រូវដាក់មេទ័ពខ្លាំង ដើម្បីដោះស្រាយបញ្ហាជូនប្រជាពលរដ្ឋ និងសង្គមជាតិបានទាន់ពេលវេលា។

សម្តេចធិបតី បានបញ្ជាក់ថា មន្រ្ដីថ្នាក់ក្រោមជាតិ ត្រូវចេះដោះស្រាយបញ្ហា កុំចាំតែថ្នាក់ជាតិជួយ បន្ទាប់អំណាចថ្នាក់លើបានផ្ដល់ជូនហើយ ប៉ុន្ដែបើដោះស្រាយអស់លទ្ធភាពហើយ ចាំស្នើទៅថ្នាក់លើជួយដោះស្រាយបន្ដ ។ សម្តេចធិបតី អះអាងថា រាជរដ្ឋាភិបាលមិនចាំតែអង្គុយបក់ផ្សែង នៅកន្លែងក្ដៅរហូតនោះទេ គឺត្រូវហ៊ានវះកាត់ និងសម្រេចផ្លាស់ប្ដូរ ដើម្បីការពារផលប្រយោជន៍ជាតិ និងប្រជាពលរដ្ឋជាធំ។

សម្ដេចបន្ថែមថា បើមេទ័ពសកម្មហើយ តែគីឡូមិនដល់ គឺយើងត្រូវតែមានការលើកទឹកចិត្ដដោយដាក់ទៅកន្លែងណាមួយឱ្យចំជំនាញរបស់គាត់ ហើយដាក់មេទ័ពថ្មីដែលខ្លាំង និងសកម្មបន្ថែមទៀត ដើម្បីជំនួសមកវិញដែលឆ្លើយតបទៅស្ថានការណ៍ទាន់ពេលវេលាផងដែរ៕