ក្នុងរយៈពេល២០ឆ្នាំនេះ កម្ពុជាបានពង្រីកជំនាញរបស់ខ្លួនរហូតដល់០៩ ជំនាញ រួមមាន ជំនាញបោសសំអាតមីន អាវុធហត្ថ វិស្វកម្មសំណង់ផ្ដេក-បញ្ឈរ វិស្វកម្មព្រលានយន្តហោះ មន្ទីរពេទ្យកម្រិត២ កម្ទេចគ្រាប់មិនទាន់ផ្ទុះ នាយទាហានសេនាធិការ និងសង្កេតការណ៍យោធា ទៅកាន់បេសកកម្ម ចំនួន១២ ក្នុងប្រទេសចំនួន១០ សរុប៧៤កង មានចំនួន១០,៩១៤នាក់ ក្នុងនោះស្ត្រីចំនួន១,០៨៣នាក់។

ប្រទេសទាំង១០ រួមមាន ប្រទេសស៊ូដង់ ស៊ូដង់ខាងត្បូង ឆាដ លីបង់ សាយប្រឹស ស៊ីរី ម៉ាលី អាហ្វ្រិកកណ្តាល យេមែន និងសាធារណរដ្ឋប្រជាធិបតេយ្យកុងហ្គោ។ បច្ចុប្បន្នកម្លាំងកម្ពុជាមានចំនួន៤៧៥នាក់ ក្នុងនោះស្ត្រី៩៥ នាក់ កំពុងបំពេញបេសកកម្មនៅប្រទេសស៊ូដង់ ស៊ូដង់ខាងត្បូង លីបង់ អាហ្វ្រិកកណ្តាល និងកុងហ្គោ លើជំនាញ កម្ទេចគ្រាប់មិនទាន់ផ្ទុះ អាវុធហត្ថ វិស្វកម្មពហុជំនាញ នាយទាហានសេនាធិការ និងសង្កេតការណ៍យោធា។

ចំពោះសមិទ្ធផលដែលដាក់សម្ពោធឱ្យប្រើប្រាស់នាពេលនេះ រួមមាន ១.អគារសាលប្រជុំតេជោសន្តិភាព មានរចនាបថខ្មែរ ដំបូលប្រក់ក្បឿងប្រភេទស្រការលិញផ្នែកខាងមុខ និងស័ង្កសីស៊ីប្រូស៊ីម៉ង់ មានបុស្បុកចំនួន០៣ មានទំហំ ៤៥ x ៥៤ម មានផ្ទៃក្រឡាសរុប ២,៩៥៥ម២ អាចទទួល សមាសភាពចំនួន៣៤៤នាក់ ព្រមទាំងមានបន្ទប់ប្រជុំតូច បន្ទប់រង់ចាំ បន្ទប់ទឹក បន្ទប់សម្អាង ឃ្លាំងដាក់សម្ភារៈ បន្ទប់កាមេរ៉ា បន្ទប់គ្រប់គ្រងសំឡេង និងបន្ទប់បកប្រែ ដែលបានចំណាយថវិកាចំនួន១,២១៦,៣៧៥ដុល្លារ។ ២.អគារសិក្សាតេជោសន្តិភាព មានរចនាបថខ្មែរ ដំបូលប្រក់ក្បឿងប្រភេទស្រការលិញ មានទំហំ ១៧ x ៤៧.៦ម មានផ្ទៃក្រឡាសរុប ១,៦៩៦.៨ម” កម្ពស់១ជាន់ (ជាន់ផ្ទាល់ដី និងជាន់ទី១) មានបណ្ណាល័យ ០១ ថ្នាក់រៀនធំ០១ ថ្នាក់រៀនតូច១២បន្ទប់ ការិយាល័យ០៣ ឃ្លាំងសម្ភារៈ០១ បន្ទប់ទឹក០៤ ដែលបានចំណាយ ថវិកាចំនួន៩១១,៩៩៨ដុល្លារ។

៣.អគារស្នាក់នៅតេជោសន្តិភាព មានរចនាបថខ្មែរទំនើប ដំបូលប្រក់ក្បឿងប្រភេទស្រការលិញ មានទំហំ ១៧ x ៤៧.៦ម មានផ្ទៃក្រឡាសរុប ១,៦៩៦.៨ម កម្ពស់១ជាន់ (ជាន់ផ្ទាល់ដី និងជាន់ទី១) មានបន្ទប់រង់ចាំ ០៣ បន្ទប់បោកអ៊ុត០១ និងបន្ទប់ស្នាក់នៅចំនួន៤០ ដែលបានចំណាយថវិកាចំនួន៨៧១,៦២៧ដុល្លារ៕