សម្តេចធិបតី បានណែឱ្យគ្រឹះស្ថានឧត្តមសិក្សាទាំងអស់ ត្រូវអនុវត្តយន្តការធានាគុណភាពអប់រំ និងពង្រឹងប្រព័ន្ធវាយតម្លៃគុណភាព ដើម្បីធានាបាននូវការបណ្តុះបណ្តាលប្រកបដោយគុណភាព និងនិរន្តរភាព ក្នុងគោលបំណងលើកកម្ពស់គុណភាពអប់រំឱ្យកាន់តែល្អប្រសើរ។ សម្តេចធិបតី មានប្រសាសន៍ថា សាលារៀនបានដើរតួនាទីយ៉ាងក្នុងការបណ្ដុះបណ្ដាល បទបញ្ជាផ្ទៃក្នុង និងទម្ងន់ ដែលជាកត្ដាទាំងនេះ គឺមានឥទ្ធិពលសំខាន់ណាស់ ដោយមិនផ្ដោតតែលើពិន្ទុនោះទេ ដើម្បីធានាសិស្សបញ្ចប់ការសិក្សាមានឥរិយាបថ និងមានសមត្ថភាពពិតប្រាកដចាប់យកការងារ ហើយជោគជ័យក្នុងជីវិត។

ជាក់ស្ដែង សញ្ញាបត្រ និងកម្រិតពិន្ទុ មិនមែនជាកត្តាកំណត់ភាពជោគជ័យសម្រាប់ការងារ និងជីវិតនោះទេ។

សម្តេចធិបតី គូសបញ្ជាក់ថា គ្រឹះស្ថានឧត្តមសិក្សារដ្ឋ ឯកជន កុំទម្លាក់គុណភាពអប់រំ ដើម្បីប្រគួតប្រជែងឱ្យសោះ ដោយអត់បានចូលរៀនហើយទទួលបានសញ្ញាបត្រ អត់តម្លៃហើយ ថ្ងៃក្រោយខូចកេរ្ដិ៍ឈ្មោះមិនល្អតែម្ដង »។

សម្តេចធិបតី បន្ថែមថា រាជរដ្ឋាភិបាលបាននិងកំពុងលើកកម្ពស់គុណភាព នៃការអប់រំ និង ការបណ្តុះបណ្តាលវិជ្ជាជីវៈ; ការអភិវឌ្ឍជំនាញ, ទាំងជំនាញរឹង និង ជំនាញទន់, ការរៀបចំកម្លាំងពលកម្មឱ្យឆ្លើយតបកាន់តែប្រសើរ ទៅនឹងការផ្លាស់ប្ដូរនៃ និម្មាបនកម្មសេដ្ឋកិច្ច, តម្រូវការទីផ្សារការងារ, និង បច្ចេកវិទ្យាឌីជីថល តាមរយៈ ការផ្លាស់ប្តូរជំនាញ និងការបង្កើនជំនាញ និងការលើកកម្ពស់សុខភាពសាធារណៈ។

ជាមួយគ្នានេះ សម្តេចធិបតី បានបង្ហាញក្តីសង្ឃឹម និងជឿជាក់យ៉ាងមុតមាំថា និស្សិតជ័យលាភីទាំងអស់ នឹងខិតខំពុះពារជម្នះរាល់ឧបសគ្គទាំងឡាយ ដើម្បីកសាងខ្លួនឱ្យកាន់តែស័ក្តិសមជាពលរដ្ឋល្អ មន្ត្រីរាជការល្អ បុគ្គលិកល្អ ដោយប្រើជំនាញ ចំណេះដឹង និង ចំណេះធ្វើពិតប្រាកដរបស់ខ្លួន ប្រកបដោយមនសិការវិជ្ជាជីវៈ ការទទួលខុសត្រូវក្នុងការងារ សីលធម៌ល្អ និងដាក់ខ្លួនបម្រើប្រជាជនដោយស្មោះសរ និងដោយឥតងាករ ដើម្បីបុព្វហេតុជាតិមាតុភូមិ៕