លោកអភិបាលខេត្តបន្តថា ឆ្នាំចាស់កន្លងទៅនេះ រដ្ឋបាលខេត្តបានខិតខំរួមសាមគ្គីគ្នា ក្នុងការងារអភិវឌ្ឍន៍ និងកិច្ចការបម្រើសេវាជូនប្រជាពលរដ្ឋ បន្សល់ទុកនូវសមិទ្ធផលជាច្រើន គួរជាទីមោទនៈ។ ប៉ុន្តែទោះជាយ៉ាងនេះក្តី កិច្ចការបន្តនៅក្នុងឆ្នាំថ្មីនេះ ឆ្នាំ២០២៥ មន្ត្រីរាជការនៃរដ្ឋបាលខេត្តទាំងអស់ ត្រូវរួបរួមគ្នាបន្តការងារទៅមុខទៀត គឺត្រូវប្រកាន់នូវគោលការណ៍ ពង្រឹងនូវគុណភាពនៃស្ថាប័នមួយនេះឱ្យកាន់តែមានភាពរឹងមាំ ឱ្យកាន់តែមានជំនឿទុកចិត្ត ហើយនិងជាក្តីសង្ឃឹមរបស់ប្រជាពលរដ្ឋ។

លោក ជាម ចន្ទ័សោភ័ណ បានបញ្ជាក់ថា រដ្ឋបាលខេត្តគឺជាចំណុចស្នូល ដែលដាក់ចេញជាទិសដៅដល់គ្រប់ភាគីពាក់ព័ន្ធទាំងអស់ ព្រមទាំងមន្ត្រីរាជការគ្រប់ក្រុង ស្រុក ឃុំ សង្កាត់ ទទួលបានគោលការណ៍យកទៅអនុវត្ត ធ្វើយ៉ាងណា កសាងនូវប្រសិទ្ធិភាព ប្រសិទ្ធិផលនិងជំនឿទុកចិត្តរបស់ប្រជាពលរដ្ឋ ក្នុងការបំពេញភារកិច្ចរបស់ខ្លួន៕