តាមរយៈសំណេរនៅលើបណ្ដាញសង្គម កាលពីថ្ងៃសៅរ៍ លោក គីម រិទ្ធី អភិបាលខេត្តព្រះវិហារ​ បានអំពាវនាវដល់បងប្អូន ពុទ្ធបរិស័ទទាំងអស់ សូមចូលរួមចំណែកក្នុងការលើកស្ទួយព្រះពុទ្ធសាសនារបស់យើង ជាជាងការឈរមើល និងរិះគន់។ ការចូលរួមនេះ មិនត្រឹមតែជាការជួយដល់វត្តអារាមប៉ុណ្ណោះទេ តែជាការសាងកុសលផលបុណ្យសម្រាប់ខ្លួនឯងផងដែរ។ បងប្អូនអាចចូលរួមធ្វើបុណ្យកសាងវត្ដដីដុះ តាមរយៈ ព្រះសិរីរក្ខិតមុនី ញ៉ សាវី ព្រះចៅអធិការវត្តបុទមរតនដីដុះ ដែលមានលេខទូរស័ព្ទ +85512236937 និងគណនី QR Code ខាងក្រោមនេះ។ ខ្ញុំករុណា ពិតជាជឿជាក់លើទឹកចិត្តដ៏បរិសុទ្ធរបស់ព្រះចៅអធិការ ព្រះសង្ឃគ្រប់ព្រះអង្គ គណៈកម្មការ និងពុទ្ធបរិស័ទចំណុះជើងវត្ត វត្តដីដុះ និងសូមកោតសរសើរចំពោះការខិតខំជាវឈើយកមកកសាងវត្តអារាម ដែលជាទីសក្ការៈដ៏សំខាន់របស់ពុទ្ធបរិស័ទខ្មែរយើង។

ដោយឡែក លោក អ៊ុន ចាន់ដា អភិបាលខេត្តកំពង់ចាម ក៍បានបង្ហោះសារដែរថា កាលពីឆ្នាំ២០២៣​ ខ្ញុំ​រួមជាមួយថ្នាក់ដឹកនាំ​ មន្រ្តី​រាជការ​ និងពុទ្ធបរិស័ទជិតឆ្ងាយ​ បានដង្ហែរអង្គកឋិនទានមហាសាមគ្គី​ ចូលមកកាន់វត្តបុទុមរតនដីដុះ​ ដេីម្បីកៀរគរបច្ច័យកសាងឧប្បដ្ឋានសាលានេះ​ ប៉ុន្តែ​បច្ច័យទទួលបានពេលនោះមិនគ្រប់ក្នុងការកសាងទាំងស្រុងឡេីយ។

អំពេីល្អ​ គឺជាសទ្ធាបុណ្យ ទោះនៅកន្លែងណាក៏ដោយ​ មិនថានៅក្នុងវត្ត​ ឫក្រៅវត្តអារាម ទីជិតឫឆ្ងាយ​ គឺយេីងនឹងទទួលបានបុណ្យកុសលសម្រាប់ជាតិនេះក្តី​ ឫជាតិក្រោយក្តី។ ខ្ញុំ​ និងឯកឧត្ដម​ គីម​ រិទ្ធី​​ ក៏ដូចបងប្អូនប្រជាពលរដ្ឋ​ដទៃទៀត ពិតជាមានសទ្ធាជ្រះថ្លាក្នុងវិស័យព្រះពុទ្ធសាសនា​ បន្តដឹកនាំឲ្យកាន់តែមានការរីកចម្រេីន​បន្ថែមទៀតក្រោមម្លប់នៃសន្តិភាព​។ ជាមួយគ្នានេះ​ សូមអំពាវនាវ​លោកយាយ​ លោកតា​ ពូមីង​ បងប្អូនប្រជាពលរដ្ឋ​ បន្តជ្រោងទង់ព្រះពុទ្ធសាសនា​ តាមរយៈ​ ការធ្វេីបុណ្យ​ ចូលរួមជាបច្ច័យ​ សម្ភារៈនានា​ ដេីម្បីកសាង​ឧប្បដ្ឋានសាលា តាមលទ្ធភាពរបស់ខ្លួន ៕