សម្ដេចធិបតីណែនាំឱ្យរដ្ឋមន្រ្ដីក្រសួងអប់រំ យុវជន និងកីឡា និងរដ្ឋមន្រ្ដីក្រសួងប្រៃសណីយ៍ និងទូរគមនាគមន៍ សហការរៀបចំការសិក្សាដោយបង្កើនលើការអានជាចំបង ចំណែកការបញ្ជាក់ថ្នាក់រៀនឌីជីថល គឺសម្រាប់ការជំរុញបន្ថែមមិនត្រូវយកធ្វើជាគោលនោះទេ ត្រូវយកការអានជាគោល។

សម្ដេចធិបតី បានបង្ហាញភាពជាក់ស្ដែងថា មានប្រទេសរីកចម្រើនមួយចំនួនដូចជា ប្រទេសដាណឺម៉ាក ស៊ុយអែត និងបណ្តាប្រទេសដទៃទៀត បាននិងកំពុងកែប្រែទម្រង់ពីការប្រើប្រាស់ថ្នាក់រៀនឌីជីថលសុទ្ធសាធងាកមកបញ្ចូល និងប្រើប្រាស់សៀវភៅឡើងវិញ បន្ទាប់ពីការសិក្សាស្រាវជ្រាវ និងការពឹងផ្អែកលើប្រព័ន្ធឌីជីថលទាំងស្រុង បានធ្វើឱ្យកម្រិតនៃការសិក្សារបស់សិស្សានុសិស្សមានភាពថយចុះ ឬរៀនខ្សោយជាងមុន។

 ទន្ទឹមនឹងនេះ សម្តេចធិបតីបានសង្កត់ធ្ងន់ថា ការបញ្ចូលគ្នារវាងការប្រើប្រាស់បច្ចេកវិទ្យាទំនើប និងការអានសៀវភៅបែបបុរាណដោយការកាន់ផ្ទាល់ដៃ គឺជាមធ្យោបាយដ៏មានប្រសិទ្ធភាពបំផុត ដើម្បីធានាបាននូវគុណភាពអប់រំ និងការចងចាំរបស់សិស្សានុសិស្សឱ្យកាន់តែប្រសើរឡើងថែមទៀត៕