បើតាម លោកឧបនាយករដ្ឋមន្រ្ដី ស សុខា រដ្ឋមន្រ្ដីក្រសួងមហាផ្ទៃ បានបញ្ជាក់ថា នៅព្រលប់ថ្ងៃទី៥ ខែសីហា ឆ្នាំ២០២៦នេះ មន្ត្រីនគរបាលជាតិនិងប្រជាការពារ សរុបចំនួន៥រូបបានស្លាប់ និងជនបង្កម្នាក់ រួមប្រជាការពារ១រូបរបួសធ្ងន់ ក្នុងប្រតិបត្តិការបង្ក្រាបអំពើហិង្សាក្នុងគ្រួសារ នៅឃុំអូរសោម ស្រុកវាលវែង ខេត្តពោធិ៍សាត់។
យោងតាមរបាយការណ៍បឋមពីនគរបាលខេត្តពោធិ៍សាត់ ករណីនេះបណ្ដាលមកពីជនល្មើសប្រើប្រាស់គ្រឿងញៀន និងប្រើអំពើហិង្សាក្នុងគ្រួសារ ដោយកម្លាំងសមត្ថកិច្ចបានចេញប្រតិបត្តិការភ្លាមៗ បន្ទាប់ពីទទួលព័ត៌មានពីប្រពន្ធជនបង្ក ប៉ុន្តែក្នុងពេលអន្តរាគមន៍នោះ ជនបង្កក៏បំផ្ទុះគ្រាប់បែក។ សមត្ថកិច្ចថា ហេតុការណ៍នេះបណ្ដាលឱ្យមានសោកនាដកម្មស្លាប់មនុស្សជាច្រើននាក់ ទី១-លោក សាម រ៉ា នាយប៉ុស្ដិ៍ (ស្លាប់) ទី២-លោក សូ សុវណ្ណរិទ្ធ មន្ត្រីប៉ុស្ដិ៍ (ស្លាប់) ទី៣-លោក ជ្រន ប្រឹម ប្រជាការពារ (ស្លាប់) ទី៤-លោក សុខ អាន ប្រជាការពារ (ស្លាប់) ទី៥-លោក ចិន្ដា ប្រជាការពារ (ស្លាប់) ៦- ជនបង្កឈ្មោះ អែម ដុំ (ស្លាប់) និងទី៧-លោក វ៉ី វឿន ប្រជាការពារ (របួសធ្ងន់) ។
បើតាម លោក ស សុខា ក្រោយកើតហេតុភ្លាម លោកបានណែនាំអគ្គស្នងការដ្ឋាននគរបាលជាតិ រដ្ឋបាលខេត្ត រួមទាំងស្នងការដ្ឋាននគរបាលខេត្តពោធិ៍សាត់ យកចិត្តទុកដាក់ឱ្យបានខ្ពស់បំផុត ក្នុងដំណើរការរៀបចំពិធីបុណ្យសពមន្ត្រីនគរបាលជាតិនិងកម្លាំងប្រជាការពារ។ ជាមួយគ្នានេះ ត្រូវបន្តខិតខំស្រាវជ្រាវទាំងមុខសញ្ញាចែកចាយគ្រឿងញៀនក្នុងមូលដ្ឋាននោះ និងប្រភពគ្រាប់បែកដែលជនបង្កបានប្រើប្រាស់។
ក្នុងនាមក្រសួងមហាផ្ទៃ និងក្នុងនាមលោករដ្ឋមន្រ្ដីផ្ទាល់ ព្រមទាំងក្រុមគ្រួសារ សូមចូលរួមរំលែកមរណទុក្ខដ៏សែនក្រៀមក្រំនេះជាមួយក្រុមគ្រួសារសព។ ពលិកម្មមន្ត្រីនគរបាលជាតិ និងប្រជាការពារយើង រួមទាំងសោកនាដកម្មក្នុងករណីនេះទាំងមូល បានដាស់តឿនយើងថា គ្រឿងញៀនគឺជាឃាតករ និងជាសត្រូវដ៏អាក្រក់របស់យើងទាំងអស់គ្នា៕