|
រឿងត្រីសាល់មុន ៖ ចរណៃនឹងបិទហាងទាំងអស់ ២ខែទៀត
ថ្ងៃទី ៖ 23-06-2026, ដោយ Dara007 , 51 Views
ភ្នំពេញៈ យីហោ«ចរណៃ» នឹងបិទហាងទាំងអស់នៅ២ខែទៀត ក្រោយផ្ទុះរឿងលក់ត្រីត្រោតបន្លំអ្នកប្រើប្រាស់ថាជា ត្រីសាល់មុនជូនប្រជាពលរដ្ឋ ។ការប្រកាសបិទទ្វារនេះ ក្រោយអាជ្ញាធរចុះពិនិត្យ និងពិន័យប្រាក់១០ ទៅ២០លានរៀល ជុំវិញករណីយកត្រីត្រោត លក់បន្លំអ្នកប្រើប្រាស់ថាជា ត្រីសាល់មុន។
យោងតាមសេចក្តីជូនដំណឹងសុំអភ័យទោសរបស់ហាងចរណៃចំពោះកំហុសឆ្គងកន្លងមក នៅថ្ងៃទី ២៣ ខែមិថុនា បានប្រកាសថា ប្រសិនបើមិនមានការប្រែប្រួលទេ ហាងទាំងអស់នឹងផ្អាកដំណើរការជាផ្លូវការ នៅថ្ងៃទី២២ ខែសីហា ឆ្នាំ២០២៦ ។
ក្នុងអំឡុងពេលនេះ ហាងនឹងបន្តលក់ស្តុកដែលនៅសល់ និងរៀបចំការងារពាក់ព័ន្ធសម្រាប់បុគ្គលិក និងម្ចាស់ទីតាំងជួល។
ហាងចរណៃ អះអាងថា ខ្លួនលក់តែត្រីសាម៉ុន និងត្រីត្រោតស្រស់ ដែលចិញ្ចឹមនៅប្រទេសន័រវែស និងអូស្ត្រាលីប៉ុណ្ណោះ ហើយមិនធ្លាប់លក់ត្រីត្រោតព្រៃ ឬត្រីត្រោតដែលនាំចូលពីប្រទេសផ្សេងឡើយ៕
|