ថ្លែងប្រាប់អ្នកសារព័ត៌មានក្នុងសន្និសីទសារព័ត៌មានរួមគ្នា ពាក់ព័ន្ធនឹង «ច្បាប់ស្តីពីការប្រឆាំងការឆបោកតាមប្រព័ន្ធបច្ចេកវិទ្យា» នៅទីស្តីការក្រសួងយុត្តិធម៌ នាព្រឹកថ្ងៃទី០៣ ខែមេសា ឆ្នាំ២០២៦នេះ លោកឧបនាយករដ្ឋមន្ត្រី កើត រិទ្ធិ រដ្ឋមន្ត្រីក្រសួងយុត្តិធម៌បានបញ្ជាក់ថា មកដល់ពេលនេះគ្រាន់តែបទល្មើសឆបោកតាមប្រព័ន្ធបច្ចេកវិទ្យា ក្នុងឆ្នាំ២០២៥កន្លងទៅនេះ មានទំហំទឹកប្រាក់ដែលត្រូវបានគេវាយតម្លៃនោះ មានប្រមាណ ៤៤២ពាន់លានដុល្លារ ដែលបទល្មើសឆបោកតាមប្រព័ន្ធបច្ចេកវិទ្យានេះ បានក្លាយជាក្តីកង្វល់មួយថ្មីរបស់ពិភពលោក រួមទាំងកម្ពុជាផងដែរ។

លោកឧបនាយករដ្ឋមន្រ្តី បញ្ជាក់ទៀតថា ដើម្បីប្រឆាំងឧក្រិដ្ឋកម្មនេះ អង្គការសហប្រជាជាតិ (UN) បានបង្កើតអនុសញ្ញាស្តីពីការប្រឆាំងឧក្រិដ្ឋកម្មឆ្លងដែនដោយមានការចាត់តាំង និងបានបង្កើត UNODC ដោយសារទំហំទឹកប្រាក់ចេញពីការជួញដូរគ្រឿងញៀននេះត្រូវបានគេវាយតម្លៃជារួមក្នុងរយៈពេលចុងក្រោយនេះ មានចន្លោះពី ៣០០ពាន់លាន ទៅ ៥០០ពាន់លានដុល្លារក្នុងមួយឆ្នាំ, បន្ទាប់មកទៀតគឺការជួញដូរមនុស្សដែលទំហំទឹកប្រាក់ ប្រមាណជាង ៣៤០ពាន់លានដុល្លារ។

«ផ្អែកតាមរបាយការណ៍កាលពីខែមីនា ឆ្នាំ២០២៦ របស់ INTERPOL ស្តីពីការវាយតម្លៃការគំរាមកំហែងនៃការឆបោកហិរញ្ញវត្ថុសកល និងរបាយការណ៍របស់ Global Anti Scam Alliance ស្តីពីស្ថានភាពសកលនៃការឆបោកឆ្នាំ២០២៥ បានបញ្ជាក់ថា នៅក្នុងរយៈពេលមួយឆ្នាំ ក្នុងឆ្នាំ២០២៥កន្លងទៅ ចំនួនទឹកប្រាក់ដែលបានបាត់បង់ដោយសារប្រព័ន្ធបច្ចេកវិទ្យា និងការបន្លំផ្នែកហិរញ្ញវត្ថុ នៅទូទាំងពិភពលោក ត្រូវបានប៉ាន់ស្មានថាមានចំនួនប្រហែល ៤៤២ពាន់លានដុល្លារ អាមេរិក»។

លោកសន្តិបណ្ឌិត ឆៃ ស៊ីណារិទ្ធ ទេសរដ្ឋមន្ត្រីទទួលបន្ទុកបេសកកម្មពិសេស និងជាអនុប្រធានប្រចាំការនៃគណៈកម្មការចំពោះកិច្ចប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា ហៅកាត់ថា គ.ប.ឆ.ប. មានប្រសាសន៍ថា គិតត្រឹមថ្ងៃទី៣ ខែមេសា ឆ្នាំ២០២៦ មន្ត្រីជំនាញបានបង្ក្រាបបទល្មើស Online Scams ២៥០ករណី ស្មើនឹង ២៥០ទីតាំង ក្នុងនោះរួមមាន កាស៊ីណូ ៩២ទីតាំងផងដែរ។

លោកបានលើកទឹកចិត្តដល់សាធារណជន បន្តផ្ដល់ព័ត៌មានពីបទល្មើសទាំងនេះ ដើម្បីចូលរួមអនុវត្តតាមបទបញ្ជារបស់ប្រមុខរាជរដ្ឋាភិបាលកម្ពុជា បោសសម្អាតបទល្មើសបច្ចេកវិទ្យានេះឱ្យអស់។ សូមជម្រាបថា គិតត្រឹមព្រឹកថ្ងៃទី៣ ខែមេសា ឆ្នា២០២៦នេះ មានជនល្មើសស្កេមអនឡាញ ៩៣នាក់ បញ្ជូនទៅតុលាការ និងឃុំខ្លួនជាង៨០០នាក់ ខណៈដែលជិត៧០០នាក់ទៀត មានដីកាតាមចាប់ ដែលស្ថិតនៅក្នុងបញ្ជីត្រួតពិនិត្យអន្តោប្រវេស្ដន៍៕