លោក សារាយ គឹមហួល ប្រធានអភិរក្សតំបន់រលួស នៃអាជ្ញាធរជាតិអប្សរាឱ្យដឹងថា ប្រាង្គលេខ៥ត្រូវជួសជុលជា២ដំណាក់កាល។ ដំណាក់កាលទី១ ក្នុងឆ្នាំ២០២៦នេះ អាជ្ញាធរជាតិអប្សរា ផ្តើមជួសជុលនៅជ្រុងខាងកើត និងខាងជើង ចាប់ពីខឿន និងជណ្តើរ មានទំហំ៩០ម៉ែត្រក្រឡា។

រីឯផ្ទៃជញ្ជាំង រហូតដល់កំពូលនៃប្រាង្គឥដ្ឋនេះមានទំហំ១៦០ម៉ែត្រក្រឡា ដោយត្រូវប្រើរយៈពេល៦ខែ។

ក្រុមការងារបានរើឥដ្ឋដែលពុកផុយចេញ ហើយដាក់ឥដ្ឋថ្មីជំនួស ពង្រឹងរចនាសម្ពន្ធឥដ្ឋឡើងវិញ សម្អាតកំណកដី បិទកំបោរបាយអនៅតាមចំណុចដែលមានប្រហោង ការពារជម្រាបទឹក ចៀសវាងរុក្ខជាតិដុះ និងការពារសត្វល្អិតកុំឱ្យចូលបំផ្លាញបន្តទៀត ដើម្បីរក្សាប្រាង្គនេះឱ្យមានភាពរឹងមាំបន្តទៀត៕