ថ្លែងក្នុងឱកាសអញ្ជើញជាអធិបតីសម្ពោធអគារសិក្សា អគារទីចាត់ការ ផ្ទះស្នាក់នៅគ្រូ និងសមិទ្ធផលនានា ក្នុងខេត្តកំពង់ស្ពឺ នាព្រឹកថ្ងៃទី៨ ខែកក្កដា ឆ្នាំ២០២៥ សម្ដេចធិបតី ហ៊ុន ម៉ាណែត នាយករដ្ឋមន្ដ្រីនៃព្រះរាជាណាចក្រកម្ពុជា ប្រកាសមិនឱ្យលុបចោលការប្រឡងបាក់ឌុបនេះចេញពីកម្មវិធីសិក្សារបស់កម្ពុជា ព្រោះសម្តេចបានទទួលព័ត៌មានលេចឮពីសាធារណៈមតិមកថា មិនចាំបាច់មានការប្រឡងបាក់ឌុបនោះទេ ខណៈបណ្ដាប្រទេសមួយចំនួនលើពិភពលោកពុំមានការប្រឡងនោះទេ។។

សម្ដេចធិបតីមានប្រសាសន៍បន្តថា នៅពេលណាប្រទេសកម្ពុជាធានាបានថា ការអប់រំតាំងពីថ្នាក់បឋម រហូតដល់ថ្នាក់មធ្យមសិក្សាមានគុណភាពហើយនោះ ចាំគិតគូរពិភាក្សាគ្នាបន្តទៀត ចំពោះភាពមិនចាំបាច់នៃប្រឡងបាក់ឌុប ប៉ុន្ដែបើគុណភាពការសិក្សានៅមានកម្រិត កម្ពុជានៅបន្តការប្រឡងដដែល ព្រោះការប្រឡងបាក់ឌុបដើម្បីជំរុញឲ្យសិស្សានុសិស្ស ខិតខំសិក្សារៀនសូត្រ។

សូមបញ្ជាក់ថា ជារៀងរាល់ចុងឆ្នាំនៃការសិក្សា កម្ពុជាតែងតែរៀបចំការប្រឡងសញ្ញាបត្រមធ្យមសិក្សាទុតិយភូមិ ឬហៅថា “បាក់ឌុប” នៅទូទាំងប្រទេស ដើម្បីបង្ហាញពីសមត្ថភាពសិស្សដែលបានរៀនតាំងពីបឋមរហូតដល់មធ្យម ។ ជាលទ្ធផលឃើញថា មានសិស្សខ្លះទទួលបាននិទ្ទេសA , B , C , D , និងE ខណៈឆ្នាំ២០២៤ មានបេក្ខជនប្រឡងជាប់ជាង១សែននាក់ ។ ក្នុងនោះនិទ្ទេសA ជាង២ពាន់នាក់ និងនិទ្ទេសB ជិត១ម៉ឺននាក់ ៕