ក្រោយបញ្ចប់កិច្ចជំនួបរវាងសម្តេចតេជោ និងលោក Pabitra Margherita អនុរដ្ឋមន្ត្រីការបរទេសឥណ្ឌា នាថ្ងៃ៧ កក្កដា លោកជា ធីរិទ្ធ អ្នកនាំពាក្យប្រធានព្រឹទ្ធសភា បានឲ្យដឹងថា ក្នុងកិច្ចជំនួបនេះ សម្តេចបានរៀបរាប់ពីដំណើរដើមទងទៅ នឹងវិវាទព្រំដែនរវាងកម្ពុជា និងថៃ ទៅកាន់ភាគីឥណ្ឌាថា អ្នកបង្កហេតុមុនគឺទាហានថៃបានបាញ់សម្លាប់ទាហានខ្មែរ កាលពីចុងខែឧសភា ។ លោកបន្តថា បន្ទាប់ពីថ្ងៃកើតហេតុនោះមក ជម្លោះផ្ទៃក្នុងរបស់ប្រទេសថៃ ក៏តែងតែកើតមានឡើង ដែលចេញមកពីការមិនស្របមតិគ្នារវាងរាជរដ្ឋាភិបាល និងក្រុមយោធា ហើយតែងតែបង្វែរមក កាន់ព្រំដែនកម្ពុជាវិញជាហូរហែរ ។

សម្តេចតេជោបញ្ជាក់ថា សម្តេចមិនមែនជាអ្នកនយោបាយឥតគុណធម៌ទេ ប៉ុន្តែអ្វីដែលធ្វើដើម្បីតែការពារ នូវបូរណភាពទឹកដី និងមិនឱ្យគេប្រមាថចំពោះទឹកដីនិងប្រជាពលរដ្ឋរបស់ខ្លួន ។ ដូច្នេះសកម្មភាពដែលកើតឡើង នូវបញ្ហាផ្ទៃក្នុងនៅក្នុងប្រទេសថៃ ហើយបង្វែរមកកាន់កម្ពុជា សម្តេចតជោគ្រាន់តែបោះនូវដុំភ្លើងដែលគេបោះមកកាន់កម្ពុជា ត្រឡប់ទៅកាន់ទីក្រុងបាងកកវិញតែប៉ុណ្ណោះ កុំឲ្យវាជះឥទ្ធិពលអវិជ្ជមានមកកាន់កម្ពុជា”។ សម្តេចតេជោ គឺមិនអាចទទួលយកបានទេ ដែលភាគីថៃបានអះអាងថា ខ្លួនកំណត់យកការប្រើប្រាស់ផែនទី គូសដោយខ្លួនឯងជាឯកតោភាគី ការបិទច្រកទ្វារព្រំដែន និងការបាញ់សម្លាប់ទាហានខ្មែរ។

លោកអះអាងទៀតថា ពាក់ព័ន្ធ ទៅនឹងជម្លោះព្រំដែននេះ ទាំងសម្តេចតេជោនិងរាជរដ្ឋាភិបាល គឺមិនចង់ឃើញការធ្វើសង្គ្រាមបង្ហូរជាមួយគ្នានេះទេ ដោយចង់ប្រើប្រាស់យន្តការ ដោះស្រាយដោយសន្តិវិធី និងតាមយន្តការតុលាការយុត្តិធម៌ អន្តរជាតិ(ICJ)។ ជាការឆ្លើយតបអនុរដ្ឋមន្រ្តីក្រសួង ការបរទេសឥណ្ឌា បានកោតសរសើរ សម្តេចតេជោ ដែលមានចក្ខុវិស័យវែងឆ្ងាយ ក្នុងការដោះស្រាយបញ្ហាព្រំដែន ជាមួយថៃដែលកំពុងកើតមាន នាពេលបច្ចុប្បន្ន ។ អនុរដ្ឋមន្រ្តីក្រសួងការបរទេសឥណ្ឌា ក៏បានចាត់ទុកការដឹកនាំរបស់សម្តេចតេជោកន្លងមកថា ជាមេដឹកនាំដ៏អស្ចារ្យ ៕