ថ្លែងក្នុងឱកាសអញ្ជើញជាអធិបតីសម្ពោធដាក់ឲ្យប្រើប្រាស់ជាផ្លូវការ ស្ពានអាកាស មរតកតេជោ នៅថ្ងៃទី៧ ខែមេសា ឆ្នាំ២០២៥ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជាបានក្រើនរំលឹកដល់អាជ្ញាធររាជធានី-ខេត្ដទាំងអស់ ត្រូវអនុវត្ដឱ្យបានម៉ឺងម៉ាត់បំផុតចំពោះក្មេងទំនើង និងគ្រឿងញៀននៅក្នុងមូលដ្ឋាន ទាំងវិធានការរដ្ឋបាលក្នុងការទប់ស្កាត់ និងការអនុវត្តច្បាប់ដោយគ្មានការបន្ធូរបន្ថយ និងលើកលែងនោះឡើយ ដើម្បីការពារសន្តិសុនសណ្តាប់សាធារណៈ និងសន្តិសុខសង្គម។

សម្ដេចធិបតីបានបញ្ជាក់ថា ការអនុវត្ដវិធានតឹងរឹងនេះ មិនមែនយកយុវជនធ្វើជាសត្រូវនោះទេ ប៉ុន្ដែយកសកម្មភាពអាក្រក់របស់យុវជនដែលត្រូវតែបោសសម្អាត់ឱ្យអស់។

ជាមួយគ្នានោះសម្តេចធិបតីក៏បានប្រកាសលើកទឹកចិត្តឱ្យយុវជនខ្មែរ ទាំងអស់ធ្វើសកម្មភាពជាក្រុម ដើម្បីធ្វើសប្បុរសធម៌ និងសកម្មភាពនានា ដើម្បីផលប្រយោជន៍សង្គមដូចជា ការដើររើសសំរាមនៅតាមទីសាធារណៈនានា មិនមែនចងជាក្រុមដើម្បីធ្វើ«បងតូច បងធំ»ដែលនាំឲ្យ សង្គមស្អប់ខ្ពើមនោះឡើយ។

ជាមួយគ្នានេះ សម្ដេចធិបតី បានថ្លែងអំណរគុណចំពោះអាជ្ញាធរ និងតុលាការគ្រប់រាជធានីខេត្ដបានដែលអនុវត្ដមានភាពល្អប្រសើរ និងត្រឹមត្រូវ ដើម្បីរួមគ្នាក៏សាងសង្គមមួយឱ្យមានសុខុដុមរមនីកម្ម៕