លោក សាយ សំអាល់ ឧបនាយករដ្ឋមន្ដ្រី រដ្ឋមន្ដ្រីក្រសួងរៀបចំដែនដី នគរូបនីយកម្ម និងសំណង់ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកែបមានប្រសាសន៍លើកឡើងដូចនេះ នៅក្នុងកិច្ចប្រជុំបូកសរុបលទ្ធផលការងាររយៈពេល ៩ខែ ឆ្នាំ២០២៤ និងលើកទិសដៅបន្ដ របស់ក្រុមការងាររាជរដ្ឋាភិបាលចុះមូលដ្ឋានខេត្តកែប នាព្រឹកថ្ងៃទី២១ ខែតុលា ឆ្នាំ២០២៤នេះ លោក សាយ សំអាល់ មានប្រសាសន៍ថា ខេត្តកែប ជាខេត្តដែលមានសក្តានុពល លើវិស័យទេសចរណ៍ ដូច្នេះរាល់ការអភិវឌ្ឍខេត្តត្រូវផ្តោតសំខាន់ ទៅលើការកែលម្អសោភ័ណភាព ហេដ្ឋារចនាសម្ព័ន្ធ តួយ៉ាងកន្លងមកខេត្តកែបសម្រេចបានជាបណ្តើរៗ នូវសមិទ្ធផលដែលគាំទ្រដល់វិស័យទេសចរណ៍ ដូចជា ឆ្នេរ២,៧០០ម៉ែត្រ ផែទេសចរណ៍កោះទន្សាយទាំងលេីគោក និងលេីកោះ ផ្លូវប្របមាត់សមុទ្រ ភ្ជាប់ពីរមណីយដ្ឋានក្រុងកែប ឆ្ពោះទៅកាន់ឆ្នេរអង្កោលប្រវែងប្រមាណជាង ១២គីឡូម៉ែត្រ ទីលានចាក់សម្រាម និងសមិទ្ធផលនានាជាច្រើនទៀត និងមានគម្រោង ផ្លូវជិះកង់ពីខេត្តកែប ទៅខេត្តកោះកុង ការកែលម្អតាមបណ្តាកោះ ឆ្នេរ ឧទ្យានជាតិនៅចំកណ្ដាលក្រុង ដែលសុទ្ធសឹងតែជាសក្កានុពលក្នុងវិស័យទេសចរណ៍ ។
ក្នុងនោះដែរ លោក ឧបនាយករដ្ឋមន្ត្រី ក៏បានណែនាំដល់មន្ទីរ អង្គភាពជំនាញ បន្តអនុវត្តតួនាទីភារកិច្ចអោយបានល្អប្រសើរ ក្នុងការផ្តល់សេវាជូនប្រជាពលរដ្ឋ ជាពិសេស ជម្រុញអោយមានហេដ្ឋារចនាសម្ព័ន្ធផ្លូវ អគ្គីសនី និងប្រព័ន្ធធារាសាស្រ្ត អោយបានគ្រប់គ្រាន់ទៅដល់ជនបទ។
នាឱកាសនោះដែរ លោក សោម ពិសិដ្ឋ អភិបាលខេត្តកែប មានប្រសាសន៍ថា តាមរយ:រាជរដ្ឋាភិបាល ដែលបានដាក់អោយអនុវត្តនូវគោលនយោបាយ ភូមិ ឃុំ សង្កាត់ មានសុវត្ដិភាព ខេត្តកែប ជាបន្តបន្ទាប់ បានប្រឹងប្រែងអនុវត្តន៍ ក្នុងរយ:ពេល៩ខែដើម ឆ្នាំ២០២៤នេះ ខេត្តសម្រេចបាននូវលទ្ធផលល្អប្រសើរ។
ជាមួយគ្នានោះ ខេត្តបានជម្រុញលើកទឹកចិត្តប្រជាពលរដ្ឋគ្រប់មជ្ឃដ្ឋាន រួមគ្នាបង្ការ ទប់ស្កាត់ បង្ក្រាបបទល្មើសគ្រប់ប្រភេទនៅតាមមូលដ្ឋាន ពិសេសបទល្មើសគ្រឿងញៀន ក្មេងទំនើង ការជួញដូរមនុស្សសកម្មភាពលួចឆក់ប្លន់ និងល្បែងស៊ីសងខុសច្បាប់ជាដើម ព្រោះបទល្មើសទាំងនោះ សុទ្ធសឹងតែជាបទល្មើសដែលបង្ករអសន្ដិសុខនៅក្នុងមូលដ្ឋាន។
លោកបន្ថែមថា តាមរយៈក្រុមការងាររាជរដ្ឋាភិបាលចុះមូលដ្ឋានខេត្តកែប ខេត្តនៅតែបន្តអនុវត្តបណ្តាសកម្មភាពជាអាទិភាពនានា ដើម្បីចូលរួមជាមួយរាជរដ្ឋាភិបាល ធ្វើឱ្យសម្រេចបាននៅចក្ខុវិស័យប្រទេសកម្ពុជា ជាប្រទេសដែលមានប្រាក់ចំណូលមធ្យមកម្រិតខ្ពស់នៅឆ្នាំ២០៣០ និងមានប្រាក់ចំណូលខ្ពស់នៅឆ្នាំ២០៥០ តាមរយៈការកៀគរដៃគូអភិវឌ្ឍន៍នានាមកអភិវឌ្ឍន៍ខេត្ត ដើម្បីបង្កើនមុខរបរ និងប្រាក់ចំណូលជូនប្រជាពលរដ្ឋ៕