ក្នុងឱកាសអញ្ជើញ ចូលរួម ពិធីសំណេះសំណាល និងបំពាក់កន្សែងយុវជនកាកបាទក្រហមកម្ពុជា មកពីគ្រឹះស្ថានឧត្តមសិក្សា២៥ក្នុងរាជធានីភ្នំពេញ នាព្រឹកថ្ងៃទី១៩ ខែតុលា ឆ្នាំ២០២៤នេះសម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា នៅតែបន្ដក្រើនរំលឹកអំពីតម្លៃនៃសុខសន្តិភាព ខណៈសន្តិភាពនេះហើយ គឺជាគន្លឹះនៃការអភិវឌ្ឍ និងជាសេចក្តីសុខរបស់មនុស្ស មនុស្សជាតិ គ្រប់រូប ហើយសម្តេចធិបតី នៅតែបន្តអំពាវនាវឲ្យរួមគ្នាថែរក្សានូវសុខសន្តិភាពនេះ ឲ្យខាងតែបាន។

សម្តេចធិបតី ហ៊ុន ម៉ាណែត បានបញ្ជាក់ថា សង្រ្គាមអាចឆេះបាន យ៉ាងលឿន និងងាយស្រួល បំផុត ប៉ុន្តែការបញ្ចប់សង្រ្គាម និងការកសាងសន្តិភាពគឺវាត្រូវការពេលវេលាយូរណាស់ ដូច្នេះបងប្អូន ទាំងអស់ ជាពិសេស យុវជន យុវនារី មិនថានៅកម្ពុជា ក៏ដូចជាពិភពលោកនោះទេ គប្បីត្រូវយល់ដឹង អំពីតម្លៃពិតនៃសន្តិភាព និង ត្រូវស្គាល់អំពីគ្រោះថ្នាក់នៃសង្រ្គាម ស្គាល់ពីការឈឺ ចាប់ នៃការបាត់បង់ មនុស្សជាទីស្រលាញ់ របស់ខ្លួន និង បណ្តុះឆន្ទៈចូលរួម ចំណែក នៅក្នុងការ ការពារសន្តិភាព ដែលមានស្រាប់ បញ្ចប់សង្រ្គាម ដែលកំពុងឆាប់ឆេះ ដើម្បីមនុស្សជាតិ។

សម្តេចធិបតីថា ពាក្យ«សន្តិភាព»នេះ ត្រូវតែទន្ទិញ ឬនិយាយហើយនិយាយទៀតមិនថា កាលៈទេសៈណានោះទេ ដោយសម្តេច បានអះអាងទៀតថា មានតែសន្តិភាពទេ ដែលបានជួយជំរុញនូវសុបិន្តអាក្រក់ ដែលកុំឲ្យវាមកក្បែរយើង ទោះបីយើងដេកលក់ក៏ដោយនោះ។

ក្នុងនោះប្រទេសមានសង្រ្គាម គឺ យុវជនទាំងអស់នឹងគ្មាន ឱកាស ធ្វើអ្វីផ្សេងទៀតក្រៅពីកាន់កាំភ្លើងនោះទេ ហើយមួយវិញទៀត សង្រ្គាមនេះមិនស្គាល់មនុស្ស និងមិន ស្គាល់អ្វីៗទាំងអស់ កុំថាឡើយអ្នកស្ម័គ្រចិត្ត យុវជនកាកបាទក្រហមនោះ៕