លោកអ្នកនាំពាក្យក្រសួងព័ត៌មាន ថ្លែងបែបនេះក្នុងឱកាសដឹកនាំកិច្ចប្រជុំតាមរយៈប្រព័ន្ធZOOM ជាមួយជាមួយថ្នាក់ដឹកនាំមន្ទីរព៏ត៌មានរាជធានី-ខេត្តទាំង២៥ កាលពីរសៀលថ្ងៃទី២៧ ខែឧសភា ឆ្នាំ២០២៦ នៅសាលប្រជុំអគ្គនាយកដ្ឋានព័ត៌មាន និងសោតទស្សន៍ ដើម្បីត្រៀមអនុវត្តយុទ្ធនាការណ៍ និយាយថាទេចំពោះព័ត៌មានក្លែងក្លាយជំហានទី២ ។

លោកគូសបញ្ជាក់ថា ព័ត៌មានក្លែងក្លាយមិនខុសពីមេរោគអាក្រក់នោះទេ ដែលវាមានចេតនាបំពុលបរិយាកាសសង្គម បង្កើតភាពវឹកវរ បំភ្លៃការពិត និងអាចបំផ្លាញកិត្តិយស ក៏ដូចជាសេចក្តីថ្លៃថ្នូររបស់បុគ្គល ឬស្ថាប័នទៀតផង។ យុវវ័យ ដែលជាអ្នកប្រើប្រាស់បណ្តាញសង្គមយ៉ាងសកម្ម ងាយនឹងរងគ្រោះ និងក្លាយជាឧបករណ៍ នៃការរីករាលដាលព័ត៌មានមិនពិតទាំងនោះ ប្រសិនបើពួកគេមិនមានសមត្ថភាព និងភាពធន់គ្រប់គ្រាន់ ដើម្បីការពារខ្លួនទប់ទល់និងហានិភ័យក្នុងយុគសម័យឌីជីថលនេះ។

លោកបានបញ្ជាក់ថា ក្នុងចំណោមប្រជាជនកម្ពុជាប្រមាណ១៧លាននាក់ មានអ្នកប្រើប្រាស់បណ្តាញសង្គមហ្វេសបុកជាយុវវ័យប្រមាណ៥៩ភាគរយ ចំណែកក្រុមជែនស៊ី (Gen Z) ដែលមានអាយុចន្លោះពី ១៤ ដល់ ២៩ ឆ្នាំ ជាង៣០ភាគរយ និយមប្រើTiktok ។

ក្នុងន័យនេះ លោលបាន ជំរុញឱ្យបណ្តាញព័ត៌មានរដ្ឋ និងមន្ទីរព័ត៌មានគ្រប់រាជធានី-ខេត្តត្រូវបង្កើនការផលិតមាតិកាព័ត៌មាន វីដេអូអប់រំ កម្សាន្តផ្សេងៗ ដើម្បីលើកកម្ពស់កម្រិតអក្ខកម្មព័ត៌មាន និងប្រព័ន្ធផ្សព្វផ្សាយ ហើយត្រូវជំរុញគិតគូរសហការជាមួយអ្នកសារព័ត៌មាន,យុវវជនដែលមានបទពិសោធន៍លើប្រព័ន្ធផ្សព្វផ្សាយ និងក្រុម MMO ធ្វើការផ្សព្វផ្សាយលើបណ្តាញ ទំនាក់ទំនងសង្គមឱ្យទូលំទូលាយ ដើម្បីផ្តល់ចំណេះដឹងកាន់តែច្បាស់ពីការវិធីការពារខ្លួនកុំឱ្យយុវវ័យ និងប្រជាជនយើងកុំឱ្យរងគ្រោះពីព័ត៌មានមិនពិត ដែលគេបង្កើតឡើងក្នុងគោលដៅបង្កភាពចលាចលក្នុងសង្គមជាតិ ។

ជាមួយគ្នានេះ លោកបានណែនាំដល់ មន្ទីរព័ត៌មានគ្រប់រាជធានី-ខេត្តទាំងអស់ឱ្យខិតខំអនុវត្តន៍ យុទ្ធនាការណ៍ និយាយថាទេចំពោះព័ត៌មានក្លែងក្លាយជំហានទី២នេះ ឱ្យបានល្អទទួលបានជោគជ័យ ដោយ សហការជាមួយមន្ទីរអប់រំ យុវជននិងកីឡា ដើម្បីផ្សព្វផ្សាយឱ្យទំលំទូលាយផ្តោតលើគោលដៅសិស្សវិទ្យាល័យ និងអនុវិទ្យាល័យ។

សូមបញ្ជាក់ថា យុទ្ធនាការប្រឆាំងព័ត៌មានក្លែងក្លាយ «និយាយថាទេចំពោះព័ត៌មានក្លែងក្លាយ» ជំហានទី២ ក្រោមប្រធានបទ «ពង្រឹងអក្ខរកម្មព័ត៌មាន និងប្រព័ន្ធផ្សព្វផ្សាយដើម្បីសុវត្ថិភាពព័ត៌មាន» ត្រូវបានបើកប្រកាសជាផ្លូវការ កាលពីថ្ងៃទី១៨ ខែឧសភា ឆ្នាំ២០២៦ នៅវិទ្យាល័យ ហ៊ុន សែន ប៊ុន រ៉ានី វត្តភ្នំ ក្រោមអធិបតីភាព ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន។ យុទ្ធនាការនេះ នឹងបន្តអនុវត្តនៅទូទាំងប្រទេស ដោយមានមន្ទីរព័ត៌មានរាជធានី-ខេត្ត ជាអ្នកដឹកនាំសម្របសម្រួល និងសហការជាមួយភាគីពាក់ព័ន្ធ ដើម្បីរៀបចំជាបន្តបន្ទាប់៕