សម្ដេចធិបតីសង្ឃឹមថា បញ្ហាព្រំដែនកម្ពុជា-ថៃ នឹងអាចដោះស្រាយបានឆាប់ចប់ដោយសារតែកម្ពុជានៅតែបន្តរក្សាជំហរដដែលក្នុងនោះមានដូចជា ដោះស្រាយតាមសន្តិវិធី ដោយផ្អែកលើសន្ធិសញ្ញា អនុសញ្ញា និងកិច្ចព្រមព្រៀងនានា ដែលភាគីទាំងពីរបានឯកភាពចុះហត្ថលេខាជាមួយគ្នា រួមទាំងយន្តការអន្តរជាតិផងដែរ។ សម្ដេចធិបតីបានបញ្ជាក់ថា យន្តការទាំងនេះរដ្ឋាភិបាលថៃ ក៏បានលើកឡើងដើម្បីដោះស្រាយបញ្ហាព្រំដែនជាមួយកម្ពុជាផងដែរ ហើយរដ្ឋាភិបាលថៃ ក៏មិនបានប្រកាសទាត់ចោលកិច្ចព្រមព្រៀងណាមួយជាមួយកម្ពុជានៅឡើយនោះដែរ។ សម្ដេចធិបតីអះអាងថា ការប្រើសង្គ្រាមដើម្បីដោះស្រាយបញ្ហាព្រំដែន គឺមិនងាយបញ្ចប់នោះទេ គឺមានតែការចរចាប៉ុណ្

ណោះ ទើបអាចដោះស្រាយបញ្ចប់បាន ជាពិសេសការចរចាទ្វេភាគី ដោយការស្មោះត្រង់ជាមួយគ្នា ដើម្បីបញ្ជៀសការបង្ហូរឈាម និងកុំឱ្យមានពលរដ្ឋ និងកងកម្លាំងបាត់បង់ជីវិត។ សំឡេង«សម្ដេចធិបតី៖ សង្គ្រាមសងទៅសងមក មិនងាយបញ្ចប់នោះទេ ប៉ុន្តែបើដោះស្រាយតាមយន្តការច្បាប់ យន្តការអន្តរជាតិ និងការទូត គឺជាយន្តការដែលអាចបញ្ចប់បញ្ហាព្រំដែនបានយូរអង្វែង និង មិនមានការបាត់បង់ជីវិត។

ប៉ុន្តែយន្តការនេះត្រូវការពេលបន្តិចដែលទាមទារឱ្យយើងត្រូវអត់ធ្មត់ ដើម្បីសម្រេចជោគជ័យ។ ជាមួយគ្នានេះ សម្ដេចធិបតីប្រកាសថា ដរាបណាការដោះស្រាយតាមផ្លូវច្បាប់ និងការទូតមិនទាន់បិទទ្វារ គឺរាជរដ្ឋាភិបាលមិនបោះបង់ចោលនោះឡើយ។ សម្តេចធិបតីបានថ្លែងថា កម្ពុជា មិនរំលោភបំពានលើអធិបតេយ្យប្រទេសណាមួយនោះឡើយ ហើយកម្ពុជា ក៏មិនឱ្យប្រទេសណាមករំលោភលើអធិបតេយ្យរបស់កម្ពុជានោះដែរ។

សម្តេចធិបតី គូសបញ្ជាក់ថា រហូតមកដល់ពេលនេះ រាជរដ្ឋាភិបាល និងកងទ័ពថៃ មិនទាន់ទាត់ចោលសេចក្តីថ្លែងការណ៍រួមកាលពីថ្ងៃទី២៧ ខែធ្នូ ឆ្នាំ២០២៥នោះទេ។ ចំណុចនេះ គឺស្របគ្នានឹងរាជរដ្ឋាភិបាល ហើយក៏ជាគន្លឹះក្នុងការដោះស្រាយបញ្ហាព្រំដែនផងដែរ៕