ក្នុងឱកាសអញ្ជើញបិទសន្និបាតបូកសរុបលទ្ធផលការងារ របស់អាជ្ញាធរជាតិប្រយុទ្ធប្រឆាំងគ្រឿងញៀន ឆ្នាំ២០២៥ នៅថ្ងៃទី៦ ខែមីនា ឆ្នាំ២០២៦ សម្តេចធិបតី ហ៊ុន ម៉ាណែត នាយករដ្ឋមន្រ្តីកម្ពុជាមានប្រសាសន៍ថា ក្រសួងរ៉ែ និងថាមពល និងក្រសួងពាណិជ្ជកម្ម ត្រូវតាមដានឱ្យជាប់ចំពោះការប្រែប្រួលលើបញ្ហាប្រេងឥន្ធនៈ និងបរិមាណនៃការនាំចូលប្រេង ដើម្បីឱ្យដឹងថា តើមានប្រទេសណាមួយបិទការនាំចេញប្រេង? ។

សម្តេចធិបតីមានប្រសាសន៍បន្តថា ការណ៍នេះត្រូវតែតាមដាន ដើម្បីចាត់វិធានការបន្ទាន់លើតម្លៃប្រេង ក៏ដូចជាការគ្រប់គ្រងឱ្យទាន់សភាពការណ៍ក្នុងការប្រើប្រាស់។

សម្ដេចធិបតីថ្លែងដូច្នេះ«ខ្ញុំបានទទួលព័ត៌មានពីកន្លែងខ្លះ ការ៉ាស់ខ្លះ ថា តំឡើងដល់ ៤០០០ ឬ ៦០០០រៀល ក្នុងមួយលីត្រ សុំឱ្យធ្វើម៉េចគ្រប់គ្រង ហើយសុំអំពាវនាវឱ្យម្ចាស់ការ៉ាស់សាំងទាំងអស់ សុំធ្វើយ៉ាងម៉េច កុំឆ្លៀតឱកាសតម្លើងហួសហេតុ វាប៉ះពាល់ដល់ជីវភាពរស់នៅរបស់ប្រជាពលរដ្ឋរបស់យើង សុំឱ្យក្រសួងពាណិជ្ជកម្ម ក្រសួងពាក់ព័ន្ធតាមមើលទៅលើកិច្ចការងារនេះ»។

សម្ដេចធិបតី ក៏បានណែនាំឱ្យភាគីពាក់ព័ន្ធក្នុងវិស័យប្រេងត្រូវចូលរួមទប់ឱ្យបាននូវការតម្លើងថ្លៃប្រេង ព្រោះប៉ះពាល់ប្រជាពលរដ្ឋដែលជាអ្នកប្រើប្រាស់ ។ ជាមួយគ្នានេះ សម្តេចធិបតី ក៏បានស្នើម្ចាស់ការ៉ាសសាំងទាំងអស់ ចូលរួមអនុវត្តជាមួយស្ថាប័នរបស់រាជរដ្ឋាភិបាល ៕