ថ្លែងប្រាប់អ្នកព័ត៌មានក្នុងសន្និសីទសារព័ត៌មានបង្ហាញពីលទ្ធផលនៃដំណើរទស្សនកិច្ចរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា អញ្ជើញទៅចូលរួមកិច្ចប្រជុំអង្គការសហប្រតិបត្តិការសៀងហៃ-បូក នៅទីក្រុងធានជីង សាធារណរដ្ឋប្រជាមានិតចិន នៅយប់ថ្ងៃទី២ ខែកញ្ញា ឆ្នាំ២០២៥នេះលោក មាស សុភ័ណ្ឌ អ្នកនាំពាក្យរបស់សម្តេចនាយករដ្ឋមន្ត្រីកម្ពុជា បានបញ្ជាក់ថា «នៅក្នុងពេលអញ្ជើញទៅដល់ទីក្រុងធានជីង សាធារណរដ្ឋប្រជាមានិតចិន សម្តេចមហាបវរធិបតី ត្រូវបានទទួលស្វាគមន៍យ៉ាងកក់ក្តៅ និងប្រកបដោយកិត្តិយសដ៏ខ្ពង់ខ្ពស់ពីតំណាងថ្នាក់ដឹកនាំនៃរាជរដ្ឋាភិបាលចិន និងថ្នាក់ដឹកនាំទីក្រុងធានជីន បន្ទាប់មកត្រូវបានទទួលស្វាគមន៍យ៉ាងកក់ក្តៅបំផុត ពីលោកប្រធានាធិបតី ស៊ី ជីនពីង»។

សូមបញ្ជាក់ថា សម្តេចមហាបវរធិបតី ហ៊ុន ម៉ាណែត បានដឹកនាំគណៈប្រតិភូ អញ្ជើញ ទៅ ប្រទេសចិន កាលពីព្រឹកថ្ងៃទី៣០ ខែសីហា ឆ្នាំ២០២៥។ ដំណើរអញ្ជើញទៅ ប្រទេស ចិននេះ ធ្វើឡើងតបតាមការអញ្ជើញ របស់ លោក ស៊ី ជីនពីង ប្រធានាធិបតីចិន ដើម្បីចូលរួមកិច្ចប្រជុំកំពូលអង្គការសហប្រតិបត្តិការសៀងហៃបូក ដែលរៀបចំធ្វើឡើងនៅទីក្រុងធានជីន ប្រទេសចិន។

ក្នុងដំណើរអញ្ជើញទៅកាន់ប្រទេសចិននាពេលនេះ ក្រៅពីការអញ្ជើញចូលរួមកិច្ចប្រជុំ ខាង លើ ហើយនោះ សម្តេចមហាបវរធិបតី ហ៊ុន ម៉ាណែត ក៏មានជំនួបជាច្រើនទៀត រួមមាន៖ ប្រធានាធិបតីចិន លោក ស៊ី ជីនពីង, លោក វ៉ាង ហ៊ូនីញ ប្រធានសភា ប្រឹក្សានយោបាយប្រជាជនចិន, លោក ជីន លីឈុន ប្រធានក្រុមប្រឹក្សាភិបាល និងជាប្រធានធនាគារវិនិយោគហេដ្ឋារចនាសម្ព័ន្ធអាស៊ី, លោក ផាម មិញជីញ នាយករដ្ឋមន្ត្រីវៀតណាម, លោក ថងលូន ស៊ីសូលីត ប្រមុខរដ្ឋឡាវ, លោក Khadga Prasad sharma Oli នាយករដ្ឋមន្ត្រីនេប៉ាល់ និងលោក អង់តូនីញ៉ូ ហ្កូតតឺរ៉េស អគ្គលេខាធិការអង្គការសហប្រជាជាតិ៕