គ្រឹះស្ថានអង្គរបានឱ្យដឹងថា ក្នុងខែមករាមានទេសចរបរទេសទិញបណ្ណ ចូល អង្គរ ចំនួន ១៤៦ ១៤០ នាក់ កើន២៦,៤៩ ភាគរយ ធៀបរយៈ ពេលដូចគ្នា ឆ្នាំ ២០២៣ និងរកចំណូលបានចំនួន ៦ ៩០៣ ៣៨០ ដុល្លារកើន២៥,៥៦ ភាគរយ ធៀប នឹងខែមករា ឆ្នាំ២០២៣។ ប្រភពដដែលបន្តថា ក្រៅពីចំណូលដែលទទួលបានពីការលក់បណ្ណជូនភ្ញៀវ ទេសចរ បរទេសទស្សនារមណីយដ្ឋានអង្គរ គ្រឹះស្ថានអង្គរក៏ទទួល បានចំណូល ពីលក់បណ្ណជូនភ្ញៀវវទេសចរនៅប្រាសាទកោះកេរចំនួន ១៧ ៥៤០ ដុល្លារ ពីទេសចរ បរទេស ៦៨៩នាក់។ ដោយឡែក ការលក់សំបុត្រទូកនាខែមករា ទទួលបានចំណូលចំនួន១២០ ៧១៧ដុល្លារ ។

រីឯចំណូលពីការ លក់សំបុត្រ ភ្នំ ក្បាលស្ពានចំនួន៦៤០ដុល្លារពី ទេសចរ១២៨នាក់។ ក្នុងខែមករានេះដែរ ចំណូលឧបត្ថម្ភមូលនិធិគន្ធបុប្ផារយៈមានចំនួន ២៩២ ២៨០ ដុល្លារ។

កាលពីថ្ងៃទី៣០ ខែមករា កន្លងទៅនេះដែរ រាជរដ្ឋាភិបាលបានដាក់ឱ្យអនុវត្តជា ផ្លូវការនូវការកែទម្រង់ប្រព័ន្ធលក់សំបុត្រ និងការត្រួតពិនិត្យសំបុត្រ ចូល ទស្សនា រមណីយដ្ឋានអង្គរ។តាមរយៈទម្រង់ថ្មីនេះ ជាវិធីសាស្រ្តងាយស្រួលសម្រាប់ភ្ញៀវ ទេសចរបរទេស ក្នុងការទិញសំបុត្រចូលទស្សនាតំបន់រមណីយដ្ឋានអង្គរ និងគោលដៅទេសចរណ៍ពាក់ព័ន្ធផ្សេងទៀត ក្រោមសមត្ថកិច្ចរបស់ គ្រឹះស្ថាន អង្គរ តាមរយៈប្រព័ន្ធកម្មវិធីទូរស័ព្ទដៃ AE Mobile និងគេហទំព័រ Angkor Enterprise® ។ មានការរំពឹងថា តាមរយៈការកែទម្រង់ប្រព័ន្ធ លក់សំបុត្រនេះ រមណីយដ្ឋាន អង្គរនឹងទទួលបានកំណើនទេសចរនិងចំណូលបន្ថែមទៀត។

គួររំលឹកថា ឆ្នាំ២០២៤កន្លងទៅ គ្រឹះស្ថានអង្គរលក់បណ្ណជូនភ្ញៀវទេសចរ បរទេស ចូលទស្សនារមណីយដ្ឋានអង្គរចំនួន១ ០២៣ ៦៨៨នាក់ និង ប្រាក់ ចំណូលចំនួន ៤៧ ៨២៦ ៩៨១ ដុល្លារ។តួលេខនេះបង្ហាញថា ភ្ញៀវ ទេសចរ បរទេស ទិញបណ្ណ ចូលទស្សនារមណីយដ្ឋានអង្គរកើនឡើង ២៨,២៧ ភាគរយ ធៀបនឹងរយៈពេលដូចគ្នាកាលពីឆ្នាំ ២០២៣កន្លង ទៅ ខណៈចំណូលដែល ទទួលបានពីការលក់បណ្ណជូនភ្ញៀវទេសចរបរទេសវិញមានកំណើនប្រមាណ២៨,៥៧ភាគរយ ៕