មនុស្ស៤ នាក់ សម្រេចឃុំខ្លួនជាបណ្តោះអាសន្ន លើសំណុំរឿងញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម
ថ្ងៃទី ៖ 24-07-2024, ដោយ Dara007 , 82 Views
ភ្នំពេញៈ សាលាដំបូងរាជធានីភ្នំពេញ បានសម្រេចឃុំខ្លួនមនុស្ស៤ នាក់ បណ្តោះអាសន្ន លើសំណុំរឿងញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម រួមមាន៖
១.ឈ្មោះ ស្រ៊ុន ស្រ៊ន ភេទប្រុស
២.ឈ្មោះ ភឹង សោភា ភេទស្រី
៣.ឈ្មោះ ចក់ ប៉ានមុន្នី ភេទប្រុស
និង៤.ឈ្មោះ សាន សិទ្ធ ភេទប្រុស និងគូកន។
ប្រភពបន្ដថា ការសម្រេចឃុំខ្លួនមនុស្ស៤នាក់នេះ ដោយត្រូវបានចោទប្រកាន់ពីបទ ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម ប្រព្រឹត្តនៅ ប្រទេសកម្ពុជា កាលអំឡុងខែកក្កដា ឆ្នាំ២០២៤ និងពេលបន្តបន្ទាប់ បទល្មើសព្រហ្មទណ្ឌដែលមានចែង និងផ្តន្ទាទោសតាមមាត្រា ៤៩៤ និងមាត្រា ៤៩៥ ក្រមព្រហ្មទណ្ឌ នៃព្រះរាជាណាចក្រកម្ពុជា។
បន្ទាប់ពីបានសួរចម្លើយជនត្រូវចោទ និងពិនិត្យភស្ដុតាង ចៅក្រមស៊េីបសួរសម្រេចឃុំខ្លួនបណ្ដោះអាសន្នលើជនត្រូវចោទទាំង៤ នាក់ ដើម្បីបន្ដការស៊ើបសួរបន្ដតាមនីតិវិធីច្បាប់។
សាលាដំបូង និងអយ្យការសាលាដំបូងរាជធានីភ្នំពេញ នឹងបន្ដអនុវត្ដច្បាប់ដោយម៉ឺងម៉ាត់ ចំពោះសកម្មភាពដែលមានចរឹកលក្ខណៈមួលបង្កាច់ ប្រឌិតព័ត៌មានមិនពិត ដែលធ្វើឡើងក្នុងចេនាទុច្ចរិត ញុះញ៉ុងបង្ករឱ្យមានភាពវឹកវរធ្ងន់ធ្ងរដល់សន្ដិសុខសង្គម៕
|