ប្រាប់អ្នកព័ត៌មានក្រោយជំនួបជាមួយលោក គ្រីស្តូហ្វឺ ចន អានដ័រសុន ឯកអគ្គរដ្ឋទូតថ្មីរបស់សហរដ្ឋអាម៉េរិក ប្រចាំព្រះរាជាណាចក្រកម្ពុជានៅថ្ងៃទី១៣ ខែវិច្ឆិកា ឆ្នាំ២០២៦ លោក ជា ធីរីទ្ធ អ្នកនាំពាក្យព្រឹទ្ធសភាបានឱ្យដឹងក្រោយបញ្ចប់កិច្ចជំនួបថា សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជាមានប្រសាសន៍ថា រាជរដ្ឋាភិបាលបានខិតខំប្រឹងប្រែងជាខ្លាំងក្នុងការប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យាអនឡាញ ។

សម្តេចតេជោបន្តថា ការឆបោកតាមប្រព័ន្ធបច្ចេកវិទ្យានេះ មិនមែនជាបញ្ហាដាច់ដោយឡែកនៅប្រទេសកម្ពុជានោះទេ ប៉ុន្តែជាបញ្ហាសកលដែលកម្ពុជាក៏ជាជនរងគ្រោះនៃបញ្ហានេះដែរ។

សម្តេចតេជោបន្ថែមថា សម្ដេចមានការជឿជាក់យ៉ាងមុតមាំ ចំពោះរាជរដ្ឋាភិបាលកម្ពុជាដឹកនាំដោយសម្ដេចមហាមវរធិបតី ហ៊ុន ម៉ាណែត នឹងប្រយុទ្ធប្រឆាំងបោសសម្អាតឧក្រិដ្ឋកម្មអនឡាញឱ្យអស់ចេញពីប្រទេសកម្ពុជា ។

សម្ដេចតេជោបញ្ជាក់ថា បញ្ហា Scam Online នេះ មិនមែនជាបញ្ហានៅតែក្នុងប្រទេសកម្ពុជាដាច់ដោយឡែកនោះទេ តែវាជាបញ្ហាសកល ដែលតម្រូវឱ្យមានការសហការ គ្នាជាបន្តបន្ទាប់ ហើយប្រទេសកម្ពុជា ក៏ជាប្រទេសមួយ ដែលរងគ្រោះដោយសារឧក្រិដ្ឋកម្មអនឡាញ ផងដែរ” ។

បើតាមអ្នកនាំពាក្យ ឯកអគ្គរដ្ឋទូតថ្មីរបស់សហរដ្ឋអាម៉េរិក ប្រចាំព្រះរាជាណាចក្រកម្ពុជា បានថ្លែងអំណរអរគុណ កម្ពុជាដែលបានសហការជាមួយអាម៉េរិក នាពេលកន្លងមកនៅក្នុងទំនាក់ទំនងទូទៅ ជាពិសេសនៅក្នុងការបោសសម្អាតឧក្រិដ្ឋកម្មអនឡាញ នៅក្នុងប្រទេសកម្ពុជា ដែលកម្ពុជាសហការបានយ៉ាងល្អជាមួយសហរដ្ឋអាម៉េរិក៕