ក្នុងពិធីសម្ពោធបើកឱ្យប្រើប្រាស់ជាផ្លូវការផ្លូវជាតិលេខ១០ នៅព្រឹកថ្ងៃទី១ ខែតុលា ឆ្នាំ២០២៦ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានផ្តាំផ្ញើដល់កងកម្លាំងប្រដាប់អាវុធគ្រប់ប្រភេទ និងអាជ្ញាធរពាក់ព័ន្ធនៅតាមមូលដ្ឋានដែលរងគ្រោះដោយទឹកជំនន់ ឱ្យយកអាយុជីវិតប្រជាពលរដ្ឋជាអាទិភាព ក្នុងការជួយសង្គ្រោះ ដោយត្រូវជួយសង្គ្រោះជីវិតមុនគេ បន្ទាប់មកទើបគិតពីទ្រព្យសម្បត្តិ។ សំឡេង៖ «កងកម្លាំងបានជួយជម្លៀសពលរដ្ឋបានទាន់ពេលវេលា។ យើងអត់ទាន់មានពលរដ្ឋស្លាប់ដោយទឹកជំនន់ទេ។ មិនត្រឹមតែជួយទេ ប៉ុន្តែការពារទាំងផ្ទះរបស់ពលរដ្ឋទៀត។

សូមអាជ្ញាធរគ្រប់កន្លែងជួយ។ មិនត្រឹមតែជម្លៀសទេ ជីវិតប្រជាពលរដ្ឋជាធំ បន្ទាប់មកទ្រព្យសម្បត្តិ។ ជីវិតត្រូវយកមុនគេ»។

សម្តេចធិបតីបានមានប្រសាសន៍សង្កត់ធ្ងន់ថា ប្រសិនបើខ្វះកម្លាំងសម្រាប់អន្តរាគមន៍ជួយប្រជាពលរដ្ឋដែលរងគ្រោះដោយទឹកជំនន់ អាជ្ញាធរពាក់ព័ន្ធត្រូវលើកសំណើមកកាន់សម្តេច ដើម្បីចាត់កងកម្លាំងពីថ្នាក់ជាតិ ចុះទៅជួយនៅថ្នាក់ខេត្ត។

សម្តេចធិបតីបានបញ្ជាក់ទៀតថា សម្រាប់ឆ្នាំនេះ បន្ទាប់ពីទឹកជំនន់ស្រកចុះ ហេដ្ឋារចនាសម្ព័ន្ធនានា នឹងអាចស្តារឡើងវិញបានជាបន្តបន្ទាប់ ជាពិសេសប្រព័ន្ធធារាសាស្ត្រ និងហេដ្ឋារចនាសម្ព័ន្ធពាក់ព័ន្ធផ្សេងទៀត៕