ថ្លែងក្នុងពិធីដុតបំផ្លាញបារីក្លែងម៉ាក និងសម្ភារពាក់ព័ន្ធដែលសមត្ថកិច្ច បានបង្ក្រាបនៅក្នុងភូមិសាស្ត្រខេត្តតាកែវ។ ពិធីនេះប្រព្រឹត្តទៅនៅភូមិត្រពាំងជ្រៃ ឃុំត្រពាំងធំខាងត្បូង ស្រុកត្រាំកក់ ខេត្តតាកែវ ថ្ងៃទី១៧ ខែកញ្ញា ឆ្នាំ២០២៦ នេះ លោកអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ អះអាងថា មន្ត្រីពាក់ព័ន្ធទាំងអស់ដែលត្រូវបានរកឃើញថាមានសារធាតុញៀនក្នុងខ្លួន ត្រូវតែបណ្ដេញចេញពីក្របខណ្ឌភ្លាមៗ។

លោកបានបញ្ជាក់ថា បញ្ហានៃការប្រើប្រាស់គ្រឿងញៀនក្នុងចំណោមមន្ត្រីរាជការ គឺជាបញ្ហាធ្ងន់ធ្ងរដែលមិនអាចអត់ឱនបានឡើយ។

លោកបានលើកឡើងពីករណីជាក់ស្ដែងមួយនាពេលថ្មីៗនេះ ដែលមានរងប៉ុស្តិ៍នគរបាលម្នាក់នៅក្រុងប៉ោយប៉ែត ខេត្តបន្ទាយមានជ័យ បានបើកបររថយន្តបុកគេ ហើយនៅពេលធ្វើតេស្តរកសារធាតុញៀន ក៏បានរកឃើញថាមានផ្ទុកសារធាតុញៀន ដែលរៀបចំនីតិវិធីស្នើសុំដាក់ទណ្ឌកម្ម ឬបណ្ដេញចេញពីក្របខណ្ឌ។

លោកបានសង្កត់ធ្ងន់ថា នីតិវិធីទាំងនេះគួរតែត្រូវបានកាត់បន្ថយឲ្យបានលឿនបំផុត ដោយមិនចាំបាច់មាននីតិវិធីស្មុគស្មាញច្រើនឡើយ។ ការកាត់បន្ថយនីតិវិធីពីច្រើនថ្ងៃមកត្រឹមមួយថ្ងៃ គឺជារឿងចាំបាច់ដើម្បីធានាបាននូវភាពរហ័សរហួន និងប្រសិទ្ធភាពក្នុងការអនុវត្តវិធានការវិន័យ។

លោកបន្ថែមថា រាជរដ្ឋាភិបាលប្តេជ្ញាចិត្តក្នុងការប្រយុទ្ធប្រឆាំងគ្រឿងញៀន និងការកសាងរដ្ឋបាលសាធារណៈមួយប្រកបដោយភាពស្អាតស្អំ គ្មានគ្រឿងញៀន ដើម្បីបម្រើប្រជាពលរដ្ឋប្រកបដោយទំនុកចិត្ត និងប្រសិទ្ធភាព៕