អ្នកនាំពាក្យរដ្ឋបាលរាជធានីភ្នំពេញ លោកស្រី ដោ សម្ផស្ស បានបង្ហោះសារនៅថ្ងៃសៅរ៍ ទី២៩ សីហានេះថា កាលពីថ្ងៃសុក្រម្សិលមុិញ អគ្គិភ័យឆេះបំផ្លាញផ្សារនាគមាស អស់ចំនួន ២១១តូប សុទ្ធសឹងជាប្រភេទតូប និងស្តង់លក់បន្លែ ផ្លែឈើ ប៉ុន្តែមិនមានបង្កជារបួស ឬស្លាប់មនុស្សនោះទេ។
បើតាមអ្នកនាំពាក្យបានបញ្ជាក់ថា ព្រឹកនេះតំណាងក្រុមហ៊ុនផ្សារ និងអាជ្ញាធរខណ្ឌទួលគោកបានចុះផ្សព្វផ្សាយអំពីដំណោះស្រាយក្នុងការរៀបចំជូនបងប្អូនអាជីវករដែលរងផលប៉ះពាល់ទាំងអស់មកលក់នៅក្នុងទីតាំងអតីតដីមជ្ឈមណ្ឌលម៉ង់ឌីយ៉ាល់ជាបណ្តោះអាសន្នសិន ដោយរង់ចាំម្ចាស់ផ្សារ និងអាជ្ញាធធ្វើការសំអាតសំណល់រួចរាល់ ។ ក្រុមហ៊ុនផ្សារនឹងសាងសង់តូប/ស្តង់ជូនអាជីវករទៅតាមទំហំ និងទីតាំងដែលមានកន្លងមកនៅកន្លែងដេីមវិញ។ បងប្អូនអាជីវករទាំងអស់ពិតសប្បាយរីករាយ និងបានសម្ដែងនូវអំណរគុណចំពោះការសម្របសម្រួលរបស់អាជ្ញាធរ និងបានទទួលយកតាមការរៀបចំនេះ ដោយមិនមានការតវ៉ាណាមួយឡើយ។
បន្ថែមពីនោះ លោកស្រី ដោ សម្ផស្ស បានផ្ញេីជូនជនឆ្លៀតឱកាស ជាពិសេសក្រុមប្រឆាំងក្រៅស្រុកមួយក្តាប់តូច កុំយកពេលមានទុក្ខលំបាករបស់បងប្អូនអាជីករ ទៅកេងចំណេញនយោបាយស្មោគគ្រោករបស់ខ្លួន ពួកគាត់កំពុងមានទុក្ខបាត់បង់ទ្រព្យសម្បតិ្ត និងខាតបង់ពេលវេលាប្រកបអាជីវកម្ម ហើយពួកគាត់បានដឹងច្បាស់ជាងគេទាំងអស់ថាគ្រោះថ្នាក់នេះកើតឡើងដោយសារអ្វីនោះ អ៊ីចឹងកុំចូលចិត្តបំពុលបរិយាកាសពេក៕