ប្រាប់អ្នកសារព័ត៌មាននៅក្នុងសន្និសីទ នាព្រឹកថ្ងៃទី១៩ ខែមិថុនា ឆ្នាំ២០២៦នេះ លោក សូ ណារ៉ូ រដ្ឋមន្ត្រីប្រតិភូអមនាយករដ្ឋមន្ត្រី បានលើកឡើងថា ពិធីបើកកិច្ចប្រជុំកំពូលពេញអង្គ អាស៊ាន-រុស្ស៊ី នៅទីក្រុងកាហ្សាន ថ្នាក់ដឹកនាំកំពូលអាស៊ាន-រុស្ស៊ី បានរំឭក ឡើងវិញនូវសមិទ្ធផលទាំងឡាយ ដែលសម្រេចបាននៃទំនាក់ទំនង រវាងដៃគូសន្ទនាអាស៊ាន-រុស្ស៊ី ចាប់ពីឆ្នាំ១៩៩១មក ហើយបានក្លាយទៅជាដៃគូយុទ្ធសាស្ត្រ ចាប់ពីឆ្នាំ២០១៨ លើវិស័យជាច្រើនដូចជា៖ សន្ទនានយោបាយ និងសន្តិសុខ ពាណិជ្ជកម្ម និងកិច្ចសហប្រតិបត្តិការសេដ្ឋកិច្ច វិទ្យាសាស្ត្រ ព័ត៌មាន និងបច្ចេកទេសទូរគមនាគមន៍ ថាមពល និងដឹកជញ្ជូន កសិកម្ម និងសន្តិសុខស្បៀង ទេសចរណ៍ សហប្រតិបត្តិការវប្បធម៌ និងការផ្លាស់ប្តូរប្រជាជន និងប្រជាជន ។

លោកគូសបញ្ជាក់ថា មានប្រសាសន៍ នៅក្នុងកិច្ចប្រជុំកំពូលនេះ សម្តេចធិបតី ហ៊ុន ម៉ាណែត បានគូសបញ្ជាក់ថា សម្រាប់ប្រទេសកម្ពុជា ឆ្នាំ២០២៦នេះ គឺជាឆ្នាំមានអត្ថន័យជាពិសេស ពីព្រោះយើងកំពុងប្រារព្ធខួបលើកទី៣៥ នៃទំនាក់ទំនងអាស៊ាន-រុស្ស៊ី និងខួបលើកទី៧០ នៃការបង្កើតកាទូតទ្វេភាគី កម្ពុជា-រុស្ស៊ី ។

ក្នុងរយៈពេល៣៥ឆ្នាំកន្លងមក អាស៊ាន និងរុស្ស៊ី បានកសាងភាពជាដៃគូដ៏រឹងមាំ និងយូរអង្វែង ដែលបង្កើតឡើងដោយផ្អែកលើការគោរពគ្នាទៅវិញទៅមក ការជឿទុកចិត្ត និងផលប្រយោជន៍រួម ។ លោកបានបញ្ជាក់ថាបន្ថែមថា សម្តេចធិបតី បានបញ្ជាក់ថា ទំនាក់ទំនងអាស៊ាន-រុស្ស៊ី នឹងបន្តរីកចម្រើនឥតឈប់ឈរ ដោយនាំមកនូវអត្ថប្រយោជន៍យូរអង្វែង ដល់ប្រជាជននិងរួមចំណេកដល់អនាគតដ៏សុខសាន្តស្ថេរភាព វិបុលភាព សម្រាប់តំបន់ទាំងពីរ ក៏ដូចជាពិភពលោកទាំងមូល»។

ចំពោះអនាគតខាងមុខ សម្តេចធិបតី បានបញ្ជាក់ថា អទិភាពសំខាន់ៗចំនួន៤ ដែលដឹកនាំទិសដៅអនាគត នៃកិច្ចសន្ទនាយុទ្ធសាស្ត្រអាស៊ាន-រុស្ស៊ី គឺ ទី១ បន្តពង្រឹងកិច្ចសហប្រតិបត្តិការនយោបាយ និងសន្តិសុខ តាមរយៈការចូលរួមកម្រិតខ្ពស់ កិច្ចសន្ទនាដ៏ទូលំទូលាយ និងសកម្មភាពកិច្ចសហប្រតិបត្តិការ ដើម្បីរក្សាអាស៊ីអាគ្នេយ៍ តំបន់សន្តិភាព និងស្ថេភាព ។ ទី២ ទាញយកសក្តានុពលពេញលេញ នៃភាពជាដៃគូសេដ្ឋកិច្ច និងការរីកចម្រើន នៃកម្មវិធីកិច្ចសហប្រតិបត្តិការពាណិជ្ជកម្ម វិនិយោគ ឆ្នាំ២០២១និងឆ្នាំ២០២៥កន្លងមក និងដាក់ចេញនូវកម្មវិធីយុទ្ធសាស្ត្រ ស្តីពីកិច្ចសហប្រតិបត្តិការសេដ្ឋកិច្ច និងវិនិយោគទុន ឆ្នាំ២០២៦ និង២០៣០ ។ ទី៣ គឺពង្រឹងកិច្ចសហប្រតិបត្តិការ លើវិស័យថាមពល និងការអភិវឌ្ឍប្រកបដោយចីរភាព និងទី៤ គឺពង្រីកកិច្ចសហប្រតិបត្តិការ ទៅលើប្រជាជនជាស្នូល ជាពិសេសគឺយុវជន និងគាំទ្រដល់កិច្ចសហប្រតិបត្តិការវប្បធម៌ ទេសចរណ៍ និងទំនាកទំនងធុរកិច្ចរវាងតំបន់ទាំងពីរ ៕