សម្ដេចធិបតីមានប្រសាសន៍ថា រាជរដ្ឋាភិបាលកកម្ពុជាបានកំណត់ការលើកកម្ពស់សមាសភាពយេនឌ័រ និងបង្កើតភាពអង្គអាចរបស់ស្ដ្រី និងក្មេងស្រីនៅក្នុងវិស័យអាទិភាព តាមរយៈពង្រីកភាពជាពលរដ្ឋនៅក្នុងសង្គម ដែលមានអរិយធម៌ប្រកបដោយសីលធម៌ សមធម៌ និងបរិយាប័ន ដែលស្រ្ដីគឺស្នូល ដើម្បីអភិវឌ្ឍន៍។ក្នុងនោះ កម្ពុជាបានវិនិយោគ និងភាពអង្គអាចស្ដ្រី និងក្មេងស្រីក្នុងវិស័យអប់រំ សេដ្ឋកិច្ច សុខភាព និងការដឹកនាំសាធារណៈ ដើម្បីបង្កលក្ខណៈអំណោយផលដល់ស្ដ្រីក្នុងការប្រើប្រាស់សិទ្ធិសម្រេចចិត្ដលើផែនការគ្រួសារ កាត់បន្ថយភាពងាយរងគ្រោះអំពើហឹង្សា និងលើកកម្ពស់ការទំនាក់ទំនងអន្ដរជំនាន់។

សម្ដេចធិបតីបានគូសបញ្ជាក់ថា រាជរដ្ឋាភិបាលកម្ពុជាក៏ទទួលស្គាល់ថា ស្រ្ដីមិនត្រឹមតែទទួលផលពីសុខសន្ដិភាពប៉ុណ្ណោះនោះទេ ប៉ុន្ដែគឺជាភ្នាក់ងារដ៏ចាំបាច់ដែលដើរតួនាទីយ៉ាងសំខាន់ចូលរួមចំណែកកសាងសុខសន្ដិភាព ចាប់ពីគ្រួសារ សហគមន៍ ប្រទេសជាតិ និងនៅលើឆាកអន្ដរជាតិ។

ជាមួយគ្នានេះ សម្ដេចធិបតី ថ្លែងកោតសរសើរលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អគ្គស្នងការសមាគមកាយឫទ្ធិនារីកម្ពុជា ដែលបានខិតខំជំរុញឱ្យក្មេងស្រីកម្ពុជាមានឱកាសកាន់តែច្រើនក្នុងការសិក្សាអប់រំ បម្រើសង្គម និងភ្ជាប់ជាមួយអន្ដរជាតិ។

សម្ដេចធិបតីក៏បានវាយតម្លៃខ្ពស់ចំពោះ សមាគមកាយឫទ្ធិនារីពិភពលោក ឬ ដែលបានបន្ដបេសកម្មដ៏មានតម្លៃក្នុងការគាំទ្រក្មេងស្រីនៅជុំវិញពិភពលោកឱ្យក្លាយជាពលរដ្ឋសកម្ម មានការទទួលខុសត្រូវ មានសមត្ថភាព និងមានទឹកចិត្ដបម្រើសង្គមផងដែរ៕