ថ្លែងក្នុងសន្និសីទសារព័ត៌មាន ស្តីពីលទ្ធផលរបស់សម្តេចមហាបវរធិបតី ហ៊ុន​ ម៉ាណែត ទៅប្រទេសហ្វីលីពីន នៅអាកាសយានដ្ឋានអន្តរជាតិតេជោ កាលពីយប់ថ្ងៃទី៨ ខែឧសភា ឆ្នាំ២០២៦ លោក ហ្សង់ ហ្រ្វង់ស័រ បានថ្លែងថា ២ថ្ងៃចុងក្រោយ ពិសេសនៅក្រៅក្របខណ្ឌជំនួបកំពូលអាស៊ាន ទំនាក់ទំនងកម្ពុជា-ថៃ គឺជាប្រធានបទផុសផុលជាងគេបង្អស់ ដោយសារកាលពីល្ងាចថ្ងៃ៧ឧសភា លោក ហ្វឺឌីណាន់ រ៉ូម៉ូលដេស ម៉ាកូស ជូញៀ ប្រធានាធិបតីហ្វីលីពីន ដែលជាប្រធានអាស៊ាន បានរៀបចំជំនួបកំពូល រវាងសម្តេចធិបតី​ ហ៊ុន ម៉ាណែត នាយករដ្ឋមន្ត្រីកម្ពុជា និងនាយករដ្ឋមន្ត្រីថៃ ។

លោកបានអះអាងថា នៅក្នុងកិច្ចប្រជុំត្រីភាគី កម្ពុជា ហ្វីលីពីន ថៃ សម្តេចធិបតី ថ្លែងរំលឹកយ៉ាងទទូចថា ការប្រើប្រាស់កម្លាំង និងការបង្កើត Fait Accompli ពោលគឺការបង្កើតអង្គហេតុ លើទីតាំងជាក់ស្តែង ខ្សែបន្ទាប់ព្រំដែន គឺជាការណ៍មួយដែលកម្ពុជា មិនអាចទទួលបានជាដាច់ខាត ។ យ៉ាងណាក្តី សម្តេចធិបតី និងនាយករដ្ឋមន្ត្រីថៃ ប្តេជ្ញាចិត្តរួមគ្នា ថានឹងធ្វើឱ្យទំនាក់ទំនងកម្ពុជា-ថៃ មានប្រក្រតីភាពឡើងវិញជាលំដាប់ គោលដៅគឺដើម្បីនៅទីបំផុត សម្រេចឱ្យបាននូវសន្តិភាពយូរអង្វែង រវាងប្រទេសជិតខាងទាំងពីរ ម្លោះហើយការពិភាក្សា ផ្តោតជាពិសេស ទៅលើវិធានការកាត់បន្ថយភាពតានតឹង រវាងថៃ និងកម្ពុជា និងកសាងទំនុកចិត្តគ្នាទៅវិញទៅមកឡើងវិញ" ។

ក្នុងនោះ រដ្ឋមន្ត្រីប្រតិភូអមនាយករដ្ឋមន្ត្រី ក៏បានបញ្ជាក់បន្ថែមថា សម្តេចធិបតី បានថ្លែងក្នុងជំនួបត្រីភាគីថា ត្រូវតែចាប់ផ្តើមឡើងវិញ នូវរាល់យន្តការ ដែលមានស្រាប់ ដូចជាគណៈកម្មាធិការចម្រុះខណ្ឌសីមាព្រំដែនគោក JBC គណៈកម្មាធិការព្រំដែនទូទៅ GBC និងគណៈកម្មាធិការ ព្រំដែនថ្នាក់យោធភូមិភាគ RBC ។

បន្ថែមលើនេះ លោក ហ្សង់ ហ្រ្វង់ស័រ បានបញ្ជាក់ទៀតថា ចំពោះសម្តេចធិបតី អ្វីដែលសំខាន់លើសគេ គឺការផ្តើមឡើងវិញភ្លាមៗឱ្យបានឆាប់រហ័សជាទីបំផុត នូវកិច្ចការងារវាស់វែង និងខណ្ឌសីមាព្រំដែនគោក ស្របតាមកិច្ចព្រមព្រៀងដែលមានស្រាប់ ពិសេសស្របទៅតាមចំណុចទី៣ នៃសេចក្តីប្រកាសរួមថ្ងៃទី២៧ធ្នូ ២០២៥ ជារួមចំពោះសម្តេចធិបតី ចាត់ទុកការងារវាស់វែងនិងខណ្ឌសីមាព្រំដែន អាចប្រព្រឹត្តិទៅបាន ដោយក្រុមការងារបច្ចេកទេសព្រំដែននៃប្រទេសទាំងពីរ សូម្បីតែមិនទាន់មានកិច្ចប្រជុំ GBC ក៏ដោយ ពីព្រោះកម្ពុជា និងថៃ មានរួចទៅហើយ ក្របខណ្ឌ យន្តការ និងកិច្ចព្រ​មព្រៀង សម្រាប់អនុវត្តនៅលើទីតាំង ដោយមិនចាំបាច់ពន្យាពេលតទៅទៀតទេ៕