ប្រាប់អ្នកសារព័ត៌មានក្រោយបញ្ចប់ជំនួបសម្តែងការគួរសមរវាងសម្តេចអគ្គមហាសេនាបតីតេជោ ហ៊ុន សែន ប្រមុខរដ្ឋស្តីទីនៃព្រះរាជាណាចក្រកម្ពុជា ជាមួយនិងលោកស្រី Marketa Kolc Hajkova ឯកអគ្គរដ្ឋទូតនៃសាធារណរដ្ឋឆែក ប្រចាំព្រះរាជាណាចក្រកម្ពុជា នៅវិមានព្រឹទ្ធសភា នាព្រឹកថ្ងៃទី២ ខែធ្នូ ឆ្នាំ២០២៥ លោក ជា ធីរិទ្ធ អ្នកនាំពាក្យព្រឹទ្ធសភា បានឱ្យដឹងថា ក្នុងជំនួបនោះ លោកជំទាវឯកអគ្គរដ្ឋទូតនៃសាធារណរដ្ឋឆែក បានបង្ហាញការខិតខំប្រឹងប្រែងកៀរគរអ្នកវិនិយោគនៅសាធារណរដ្ឋឆែក ដើម្បីស្វែងរកការធ្វើវិនិយោគនៅកម្ពុជានាពេលខាងមុខ។

លោកស្រីបានបញ្ជាក់ថា ការជំរុញឱ្យអ្នកវិនិយោគនៅសាធារណរដ្ឋឆែកមកបណ្ដាក់ទុកនិយោគនៅកម្ពុជានេះ ដោយផ្ដោតលើវិស័យកសិកម្ម ជាពិសេសដំណាំម្រេចនៅកម្ពុជា ដើម្បីបង្ហាញសញ្ញាទំនាក់ទំនងដ៏ល្អរវាងប្រទេសទាំងពីរ ទាំង សេដ្ឋកិច្ច ពាណិជ្ជកម្ម និងនយោបាយ»។

ជាមួយគ្នានេះ លោកស្រីនឹងប្ដេជ្ញាពង្រីកនូវកិច្ចសហប្រតិបត្ដិការបន្ថែមទៀត ហើយជំរុញឱ្យមានព្រឹត្ដិការណ៍ និងដំណើរទស្សនកិច្ចរបស់ដឹកនាំជាន់ខ្ពស់របស់សារធាណរដ្ឋឆែកនៅកម្ពុជាផងដែរ។

ជាការឆ្លើយតប សម្ដេចតេជោប្រមុខរដ្ឋស្ដីទីបានសម្ដែងការពេញចិត្ដចំពោះការលើកឡើងរបស់លោកស្រីឯកអគ្គរដ្ឋទូតនៃសាធារណរដ្ឋឆែក ហើយសម្ដេចតេជោក៏បានរំលេចអំពីសក្ដានុពលពាណិជ្ជកម្មរវាងកម្ពុជា ឆែក នូវមានចន្លោះជាច្រើនទៀត ដើម្បីធ្វើការជាមួយគ្នាដែលសមស្របទៅនឹងទំនាក់ទំនងការទូត និងនយោបាយរវាងប្រទេសទាំងពីរមានភាពយូរអង្វែង និងមានភាពល្អប្រសើរ។

ជាមួយគ្នានេះ សម្ដេចតេជោសង្ឃឹមថា សាធារណរដ្ឋឆែក នឹងធ្វើយ៉ាងណាចាត់ទុកប្រទេសកម្ពុជាជាដៃគូដ៏ល្អក្នុងការពង្រីការទំនាក់ទំនង រួមទាំងពាណិជ្ជកម្មនានា ដែលអាចធ្វើជាមួយគ្នាទាំងទ្វេភាគី និងពហុភាគីនៅក្នុងតំបន់ប្រទេសទាំងពីរ៕