លោក ហេង រតនា បានបញ្ជាក់ថា ក្រោយឧបទ្ទវហេតុគ្រោះថ្នាក់ផ្ទុះមីនជនជាតិចិនម្នាក់នេះភ្លាម ខាងភាគីថៃបានបំពងសំឡេងវាយប្រហារលាបពណ៌កម្ពុជាថា ជនជាតិចិនលួចឆ្លងដែនពីកម្ពុជាទៅថៃ និងជាពិសេស ចោទប្រកាន់ថា កម្ពុជាមិនសហកាដោះមីនតាមបណ្តោយព្រំដែនជាដើម...។ ដោយការចោទប្រកាន់ទាំងឡាយនោះបានបន្សល់នូវចម្ងល់និងភស្តុតាងមួយចំនួនគួរពិចារណាស្វែងយល់ការពិតយ៉ាងច្រើន។

លោកបានបញ្ជាក់តំបន់នេះជាចម្ការមីនចាស់របស់កម្ពុជាសំណល់សង្គ្រាមដោយមានភស្តុតាងច្បាស់លាស់ទាំងប្រភេទគ្រាប់មីន ភូមិសាស្ត្រមានទំនប់ជីក មានលេណដ្ឋានកងទ័ពមានរបងបន្លាលួសចាស់ និងជាព្រៃក្រាស់ ។ ការដាក់គ្រាប់មីនបានកើតឡើងតាំងពីក្នុងពាក់កណ្តាលទសវត្សរ៍១៩៨០ដល់ដើមទសវត្សរ៍១៩៩០។

លោកបន្ថែមថា ករណីផ្ទុះមីនជនជាតិចិនម្នាក់នេះ ធ្វើឱ្យមនុស្សម្នាទាំងឡាយនឹកឃើញព្រឹត្តិការណ៍ប្រវត្តិសាស្ត្រដែលទាហ៊ានថៃបានដឹកជនភៀសខ្លួនកម្ពុជាដែលមានឯកសារខ្លះបានបញ្ជាក់ថា មានចំនួនប្រមាណជាង៤៣.០០០នាក់មានទាំងទារក ក្មេងចាស់ប្រុសស្រី យកមកចាក់ចោលនៅតំបន់ភ្នំខ្មោច ដោយបង្ខំឱ្យដើរឆ្លងកាត់ចម្ការមីនមកកម្ពុជាវិញ បណ្តាលឱ្យជាន់គ្រាប់មីនរបួសនិងស្លាប់យ៉ាងច្រើន។ អ្នកខ្លះមានចម្ងល់ថា "ថៃតែងតែជាន់មីនថ្មី ហេតុអ្វីចិនជាន់មីនចាស់"? នេះជារឿងរ៉ាវប្រវត្តិសាស្ត្រត្រូវតែរំលឹកចងចាំនិងមិនអាចបំភ្លេចបាន។

សូមបញ្ជាក់ថា បញ្ហាផ្ទុះគ្រាប់មីនប្រឆាំងមនុស្សរបួសដាច់ជើងម្ខាងនិងរងរបួសដៃព្រមទាំងផ្ទៃមុខ ជនជាតិចិនម្នាក់ភេទប្រុស វេលាម៉ោងប្រមាណ៣:២០នាទីព្រឹកទៀបភ្លឺ នៅថ្ងៃទី២៩ ខែវិច្ឆិកា ឆ្នាំ២០២៥ នៅភូមិសាស្រ្តចម្ការមីនកម្ពុជាលេខBS:22575 ក្បែរបង្គោលសីមាលេខ៤៨ ស្ថិតនៅភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ៕