លោកស្រី ភឹម ចាន់ធី គឺជាស្ត្រីមេម៉ាយត្រូវប្តីស្លាប់ចោល ហើយបន្សល់ទុកកូនតូចៗចំនួន៧នាក់ក្នុងបន្ទុកលើខ្ទមកំសត់។ដោយមើលឃើញពីភាពលំបាកក្នុងការរ៉ាប់រងចិញ្ចឹមកូនតែម្នាក់ឯង និងការរស់នៅមិនសមរម្យ សាខាកាកបាទក្រហមកម្ពុជាខេត្តក៏បានសម្រេចសង់ផ្ទះមួយខ្នងដើម្បីផ្តល់ជូនឱ្យរស់នៅបានសមរម្យនិងគត់មត់ពីភ្លៀងខ្យល់ផ្គររន្ទះ។ដោយឡែក ស្ថិតក្នុងវ័យចាស់ជរា គ្មានទីពឹងនិងរស់នៅក្នុងខ្ទមរហែក លោកយាយ គង់ ស៊ន អាយុ៧៩ឆ្នាំ ក៏ត្រូវបានកាកបាទក្រហមកម្ពុជាសង់ផ្ទះមួយខ្នងជូនផងដែរ។

ក្នុងឱកាសប្រគល់ផ្ទះទាំង២ខ្នងនោះ លោក ជាម ច័ន្ទសោភ័ណ បានលើកឡើងថា កាកក្រហមកម្ពុជាតែងតែស្ថិតនៅជិតបងប្អូនប្រជាពលរដ្ឋគ្រប់កាលៈទេសៈ ហើយតែងតែខ្វល់ខ្វាយ និងគិតពីសុខទុក្ខរបស់បងប្អូន ដូចពាក្យស្លោកថា ទីណាមានការលំបាក ទីនោះតែងតែមានកាកបាទក្រហមកម្ពុជាជានិច្ច។

លោក ជាម ច័ន្ទសោភ័ណ បានបញ្ជាក់បន្ថែមថា ក្រោមការដឹកនាំដ៏ឈ្លាសវៃ និងប៉ិនប្រសប់របស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន បានធ្វើឱ្យប្រជាពលរដ្ឋនៅគ្រប់មូលដ្ឋានមានក្តីសង្ឃឹមឡើងវិញ ពិសេសបានគេចផុតពីការស្រែកឃ្លាន មានការហូបចុកគ្រប់គ្រាន់ និងមានទីជម្រករស់នៅបានសមរម្យ តាមរយៈការជួយឧបត្ថម្ភស្បៀងសង្គ្រោះបឋម និងសង់ទីជម្រកផ្តល់ជូនជាបន្តបន្ទាប់។ ជាក់ស្តែងផ្ទះចំនួន២ខ្នង ដែលសង់ឡើងពីដែកប្រក់ដំបូលស័ង្កសីនេះ កាកបាទក្រហមកម្ពុជាក៏បាននិងសង់ជូនដល់បងប្អូនប្រជាពលរដ្ឋយើងនៅទីនេះ ដែលមានជីវភាពទីទ័លក្រដែរ ដើម្បីបានរស់នៅសមរម្យស្មើមុខស្មើមាត់ជាមួយប្រជាពលរដ្ឋក្នុងភូមិ។ ហើយក្រោយពីទទួលបានផ្ទះនេះ សូមបងប្អូនជួយថែរក្សា និងខិតខំបង្កបង្កើនផល ចិញ្ចឹមសត្វ ដើម្បីស្ទួយជីវភាពគ្រួសារបន្ថែម។

ជាមួយនោះ ប្រធានគណៈកម្មាធិការសាខាកាកបាទក្រហមកម្ពុជាខេត្តកំពង់ស្ពឺលោក ជាម ច័ន្ទសោភ័ណ ក៏បានណែនាំដល់លោកស្រី ភឹម ចាន់ធី ឱ្យជំរុញកូនៗបានចូលរៀនគ្រប់គ្នា ដើម្បីអនាគតពួកគេ ហើយរាល់ការចំណាយក្នុងការធ្វើដំណើរតាមរម៉កដឹកជញ្ជូនប្រចាំខែគឺលោកជាអ្នកឧបត្ថម្ភ។ទន្ទឹមនោះ ដើម្បីសម្រាលបន្ទុកសម្រាប់ការហូបប្រចាំថ្ងៃដល់គ្រួសារនេះ លោកក៏បានឧបត្ថម្ភបន្ថែមក្នុងមួយខែអង្ករ២ការ៉ុងនិងគ្រឿងទេសក៍មួយចំនួនបន្ថែមទៀត។

សូមបញ្ជាក់ថា ក្នុងពិធីប្រគល់ផ្ទះ២ខ្នង ដល់គ្រួសារទីទ័លក្រ ប្រធានគណៈកម្មាធិការសាខាកាកបាទក្រហមកម្ពុជាខេត្តកំពង់ស្ពឺ ក៏បានផ្តល់នូវស្បៀងសង្គ្រោះបឋម ដល់គ្រួសាររងគ្រោះ និងងាយរងគ្រោះ ដែលកំពុងរស់នៅក្នុងភូមិចំនួន ២៤គ្រួសារផងដែរ៕