ការព្រមាននេះធ្វើឡើងក្នុងឱកាសថ្លែងសារពិសេសក្នុងកិច្ចប្រជុំពេញអង្គព្រឹទ្ធសភា ពីបញ្ហាព្រំដែនកម្ពុជា-ថៃ មុននឹងចូលដល់របៀបវារៈនៃអង្គប្រជុំព្រឹទ្ធសភា សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា មានប្រសាសន៍ថា ថ្ងៃនេះ តាមពិតត្រូវបិទច្រកព្រំដែនទាំងអស់នៃការនាំចូលទំនិញពីប្រទេសថៃ ប៉ុន្ដែកម្ពុជាពន្យារពេល២៤ម៉ោងទៀត ដោយមានការចរចារជាមួយនាយករដ្ឋមន្រ្ដីថៃ ហើយបើថ្ងៃនេះ ភាគីថៃមិនអនុវត្តតាមកិច្ចចរចាបើកច្រកព្រំដែនឱ្យដូចដើមឡើងវិញទេ កម្ពុជានឹងបិទច្រកទ្វារទាំងស្រុងតែម្ដង ។

សម្ដេចតេជោបានអះអាងថា កម្ពុជា នឹងមិនធ្វើការចរចាណាមួយចំពោះ ការបើកច្រកព្រំដែននោះឡើយ ខណៈដែលកងទ័ពថៃបានបិទព្រំដែនដោយឯតោភាគី បើកងទ័ពថៃបានបិទព្រំដែន ក៏ជាអ្នកបើកដោយខ្លួនេងដែរ ។ ការស្នើសុំចរចា ដើម្បីកុំឱ្យបាក់មុខ ហើយទាញកម្ពុជាទៅបាក់មុខជាមួយ កម្ពុជាជាប្រទេសដែលមានកិត្ដិយស មានសេចក្ដីថ្លៃថ្នូ និងចេះទទួលខុសត្រូវ។

សម្ដេចតេជោ ក៏ប្រាប់ពលរដ្ឋថៃ កុំបន្ទោសកម្ពុជាចំពោះការបិទច្រកដូង បិទការនាំចូលបន្លែផ្លែឈើមកកម្ពុជា គួរ តែបន្ទោសពួកទាហានរបស់ខ្លួនចុះ ។

ក្នុងឱកាសនេះ សម្ដេចតេជោ ហ៊ុន សែន បានណែនាំឱ្យពលរដ្ឋខ្មែរ អ្នកមានលទ្ធភាព ខិតខំប្រមូលទិញផលិតផល បន្លែ ផ្លែឈើ របស់កសិករខ្មែរ យកទៅចែកជូនកងទ័ពជួរមុខ ឬអង្គការ សមាគមន៍មើលថែកុមារកំព្រាជាដើម ខណៈសម្ដេចបានបញ្ជាក់ថា បើថៃមិនបើកព្រំដែនវិញនៅថ្ងៃនេះ កម្ពុជានឹងបិទច្រកព្រំដែនទាំងអស់ នៅថ្ងៃស្អែកលែងឱ្យមានការនាំចូលទំនិញគ្រប់ប្រភេទ។