លោក ជា វុទ្ធី អគ្គលេខាធិការគណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា (ក.អ.ក.) បានមានប្រសាសន៍ថា នេះជាលើកទី១ហើយ ដែល ក.អ.ក. បាន អនុម័តគម្រោងវិនិយោគ រហូតដល់ទៅជាង ៤០០គម្រោង ក្នុងរយៈពេលត្រឹម ១ឆ្នាំ។ ជាមួយគ្នានេះ ក្នុង រយៈពេល២ខែដើមឆ្នាំ២០២៥ ចំនួនគម្រោងវិនិយោគសរុបដែលត្រូវបានអនុម័តមានចំនួន ១១២គម្រោង ជាមួយនឹងទំហំទុនវិនិយោគប្រមាណ ១ប៊ីលានដុល្លារអាម៉េរិក។ ចំនួនគម្រោងវិនិយោគក្នុងរយៈពេល២ខែដើម ឆ្នាំ២០២៥នេះ គឺស្ទើរតែប្រហាក់ប្រហែលទៅនឹងចំនួនគម្រោងវិនិយោគដែល គ.វ.ក. អនុម័តក្នុងរយៈពេល មួយឆ្នាំនៃឆ្នាំ២០២១ គឺប្រមាណ ១៦៩ គម្រោង។

លោក ជា វុទ្ធីបានបញ្ជាក់ថា ការកើនឡើងយ៉ាងគំហុកនៃគម្រោងវិនិយោគនេះ មិនត្រឹមតែបង្ហាញពីនិន្នាការតំបន់ និងសកលដែលកំពុង កើតមានឡើងនោះទេ ប៉ុន្តែក៏បង្ហាញពីទំនុកចិត្តរបស់វិនិយោគិនមកលើកម្ពុជា និងជាពិសេសជាលទ្ធផលនៃការ ប្តេជ្ញាចិត្ត របស់រាជរដ្ឋាភិបាល ក្នុងការធ្វើឱ្យប្រសើរឡើងនូវបរិយាកាសធុរកិច្ច និងវិនិយោគនៅកម្ពុជាផងដែរ។

ត្រង់ចំណុចនេះ លោក ជា វុទ្ធី បញ្ជាក់ទៀតថា ក្រោមការដឹកនាំដ៏ស្វាហាប់ និងឈ្លាសវៃ របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា រាជរដ្ឋាភិបាលបានប្តេជ្ញាបន្តរក្សាឱ្យបានដាច់ខាត នូវមូលដ្ឋានគ្រឹះសំខាន់ៗ ក្នុងការធានាបាននូវភាពជោគជ័យនៃការបណ្តាក់ទុនវិនិយោតរយៈពេលវែង តាមរយៈ ការរក្សាឱ្យបាននូវសុខសន្តិភាព, ស្ថិរភាពនយោបាយ និងសេដ្ឋកិច្ច ព្រមទាំងការធ្វើឱ្យកាន់តែប្រសើរឡើងនូវ បរិយាកាសធុរកិច្ច និងការវិនិយោគផងដែរ។

ជាងនេះទៅទៀត ដោយយល់ជាក់ច្បាស់ថា ហេដ្ឋារចនាសម្ព័ន្ធដែលមានលក្ខណៈល្អប្រសើរ នឹង ចូលរួមចំណែកក្នុងការកាត់បន្ថយចំណាយធុរកិច្ច និងសន្សំសំចៃពេលវេលា រាជរដ្ឋាភិបាលបានវិនិយោគ យ៉ាងច្រើនសន្ធឹកសន្ធាប់ លើតម្រោងហេដ្ឋារចនាសម្ព័ន្ធចម្បងៗ រួមមាន៖ ការសាងសង់ផ្លូវល្បឿនលឿន ជាពិសេសផ្លូវល្បឿនលឿនភ្នំពេញ-បាវិត ដែលគ្រោងនឹងបញ្ចប់ការសាងសង់នៅឆ្នាំ២០២៧, កំពង់ផែទឹកជ្រៅ, ព្រែកជីកប្រវត្តិសាស្ត្រហ្វូណនតេជោ, អាកាសយានដ្ឋានអន្តរជាតិ និងមជ្ឈមណ្ឌលភស្តុភារកម្ម ជាដើម។ ហេដ្ឋារចនាសម្ព័ន្ធទាំងនេះនឹងចូលរួមចំណែកដោយផ្ទាល់ ក្នុងការលើកកម្ពស់ការតភ្ជាប់ក្នុងតំបន់ ព្រមទាំង ធានាលទ្ធភាពក្នុងការដឹកជញ្ជូនឆ្លងកាត់តាមច្រករបៀងសេដ្ឋកិច្ចសំខាន់ៗនៅកម្ពុជា និងក្នុងតំបន់ប្រកបដោយ ប្រសិទ្ធភាពខ្ពស់។

លើសពីនេះ លោក ជា វុទ្ធី បន្ថែមថា ក្នុងគោលបំណងបង្កើតបរិយាកាសធុរកិច្ចដែលឆ្លើយតបទៅនឹងតម្រូវការនិងក្តីកង្វល់ របស់វិនិយោគិន រាជរដ្ឋាភិបាលបានបង្កើតយន្តការនានាជាច្រើន។

សូមបញ្ជាក់ថា ក្នុងឆ្នាំ២០២៤កន្លងទៅ គណៈកម្មាធិការវិនិយោគកម្ពុជា (គ.វ.ក.) បានអនុម័តគម្រោង វិនិយោគទាំងក្នុង និងក្រៅតំបន់សេដ្ឋកិច្ចពិសេសសរុបចំនួន ៤១៤គម្រោង ក្នុងទំហំទុនវិនិយោគសរុបប្រមាណ ៦, ៩ប៊ីលានដុល្លារអាមេរិក។ បើប្រៀបធៀបនឹងឆ្នាំ២០២៣ ចំនួនគម្រោងវិនិយោគមានការកើនឡើងប្រមាណ៥៤ភាគរយ រីឯទំហំទុនវិនិយោគមានការកើនឡើងប្រមាណ ៤០ភាគរយ៕