ថ្លែងក្នុងពិធីសម្ពោធដាក់ឲ្យប្រើប្រាស់ជាផ្លូវការ អគារសិក្សា អគារស្នាក់នៅរបស់គ្រូបង្រៀន ទីចាត់ការ និងអគារកាត់ដេរ នៅវិទ្យាល័យ ហ៊ុនសែន វាលរេញ នាព្រឹកថ្ងៃទី២៦ ខែមីនា ឆ្នាំ២០២៥ សម្តេចបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា មានប្រសាសន៍ថា សកម្មភាពដែលសម្តេចនឹងធ្វើផ្គើនទៅក្រុមប្រឆាំងនោះគឺការចុះសម្ពោធសមិទ្ធផលនានាដូចជា សាលារៀនដែលនៅសល់ជិត១ពាន់កន្លែង និងចុះដោះស្រាយបញ្ហាកង្វល់របស់ពលរដ្ឋ តាមរយៈការបង្កើនកម្មវិធីផ្តល់ដីជូនពលរដ្ឋ ធ្វើបណ្ណសមធម៌ឲ្យពលរដ្ឋទៅពេទ្យដោយមិនអស់ថវិកាជាដើម ។

ចំពោះករណីរិះគន់ពីសំណាក់ក្រុមប្រឆាំងនេះ សម្តេចឆ្លើយតបថា កុំរវល់ទៅឈឺក្បាល វិលមុខជាមួយពួកគេ ហើយបើមិនឆ្លើយឆ្លងទៅវិញ ពួកគេវិញទេដែលធ្វើឲ្យពិបាកក្នុងខ្លួនទៅវិញទេ ។

ជាមួយគ្នានេះដែរ សម្តេចធិបតីបានបន្តថា ពួកគេបានតែស្រែកគ្មានបានសាច់ការពីក្រៅប្រទេសនៅលើវេទិកានានាថា សម្តេចមិនធ្វើសកម្មភាពអ្វី ប៉ុន្តែផ្ទុយទៅវិញសម្តេចបានចុះដោយផ្ទាល់ជួបពលរដ្ឋដោយភាពស្និតស្នាលបំផុត ៕