លោក ឆារស៍ វ៉ាន់ នាយកគ្រប់គ្រង នៃក្រុមហ៊ុន ខេមបូឌា អ៊ែរផត អ៊ិនវេសមិន ឯ.ក (CAIC) បច្ចុប្បន្ននេះ រាល់ដំណើរការសាងសង់ នៃអាកាសយានដ្ឋានអន្តរជាតិតេជោ គឺដំណើរការទៅតាមផែនការ ហើយពុំមានបញ្ហាអ្វីធំដុំនោះទេ គឺនៅសល់តែបញ្ហាតិចតួចតែប៉ុណ្ណោះ ដើម្បីត្រៀមរៀបចំបន្ដ ក្នុងការបញ្ចប់ការងារសាងសង់ នៅឆ្នាំ២០២៥។

តាមការបញ្ជាក់ពីឧកញ៉ា ឆារស៍ វ៉ាន់ បានបញ្ជាក់ថា នៅពេលបើកដំណើរការដំណាក់កាលទី១ អាកាសយានដ្ឋានអន្ដរជាតិតេជោ អាចទទួលភ្ញៀវបាន១៥លាននាក់ ខណៈដំណាក់កាលទី២អាចបាន៣០លាននាក់ និងដំណាក់កាលទី៣អាចបានដល់៥០លាននាក់។

គួរបញ្ជាក់ថា បើគ្មានការប្រែប្រួលទេដំណាក់កាលទី១ នៃអាកាសយានដ្ឋានអន្ដរជាតិតេជោ នឹងបើកដំណើរការនៅអំឡុងខែកក្កដាខាងមុខនេះ។ បន្ទាប់ពីនោះនឹងមានការសាងសង់ដំណាក់កាលទី២ និងទី៣បន្ថែមទៀត ។ លោកថា «អាកាសយានដ្ឋានអន្តរជាតិតេជោ» ជាអាកាសយានដ្ឋានដែលធំជាងគេលំដាប់អាស៊ី ហើយក៍លំដាប់ពិភពលោកដែរ តែអ្វីដែលអស្ចារ្យនោះ គឺរចនាបថ និងអត្តសញ្ញាណជារបស់ខ្មែរ ទាំងការដាំដើមត្នោត និងផ្ការំដួល។

សូមបញ្ជាក់ថា អាកាសយានដ្ឋានអន្តរជាតិតេជោ ចាប់ផ្តើមសាងសង់នៅ ឆ្នាំ២០២០ មានលើផ្ទៃដីសរុប ២,៦០០ហិកតា ស្ថិតនៅចម្ងាយ ១៩គីឡូម៉ែត្រ ពីរាជធានីភ្នំពេញ។ អាកាសយានដ្ឋានអន្តរជាតិតេជោ ជាប្រភេទ 4F គឺប្រភេទព្រលានយន្តហោះធំ ដែលអាចនឹងស្រូបយក និងទទួលបានការហោះហើរពីឆ្ងាយឆ្លងទ្វីប ដែលអាចឲ្យប្រភេទយន្តហោះធុនយក្ស រហូតដល់ Airbus A380-800 និង យន្តហោះ Boeing 747-800 ចុះចតបាន៕