ថ្លែងក្នុងកម្មវិធីសិក្ខាសាលាស្ដីពីបច្ចេកវិទ្យា ជាមួយក្រុមហ៊ុន Tik Tok នៅក្រសួងប្រៃសណីយ៍ នាព្រឹកថ្ងៃទី១៩ មីនា ២០២៥ លោក ជា វ៉ាន់ដេត រដ្ឋមន្រ្តីក្រសួងប្រៃសណីយ៍បានមានប្រសាសន៍ថា ក.ប.ទ. បានសហការជាមួយក្រុមហ៊ុន TikTok រៀបចំសិក្ខាសាលាផ្សព្វផ្សាយ ស្ដីពីសុវត្ថិភាពលើប្រព័ន្ធអនឡាញ និងគោលការណ៍ណែនាំរបស់ក្រុមហ៊ុន TikTok ក្នុងគោលបំណងចែករំលែកព័ត៌មាន ឱកាសរកប្រាក់ចំណូល (TikTok Monetization) សម្រាប់អ្នកផលិតមាតិកា ឧត្តមានុវត្តន៍នៃការការពារសុវត្ថិភាពលើប្រព័ន្ធអនឡាញ គោលការណ៍ណែនាំសហគមន៍ និងការប្រើប្រាស់បណ្តាញសង្គម TikTok ប្រកបដោយប្រសិទ្ធភាព ដល់ក្រសួង ស្ថាប័ន អ្នកសារព័ត៌មាន និងអ្នកផលិតមាតិកា។ លោកបានបញ្ជាក់ថា បណ្ដាញសង្គមបានផ្ដល់អត្ថប្រយោជន៍ជាច្រើនទាំងបណ្ដាញសង្គម និងសេដ្ឋកិច្ច ។ប៉ុន្ដែទោះបីជាយ៉ាងណា ក៏បានផ្ដល់ហានិភ័យដល់អ្នកប្របើប្រាស់ និងអ្នកប្រកបមុខរបរនេះផងដែរ។

លោកបានបញ្ជាក់ទៀត កាលពីពេលកន្លងមក អ្នកបង្កើតមាតិកាជាច្រើននៅកម្ពុជា បានស្នើទៅសម្តេចនាយករដ្ឋមន្រ្តី ដើម្បីឱ្យក្រុមហ៊ុន TikTok ហ្វេសប៊ុក និងបណ្តាញសង្គមផ្សេងទៀតផ្តល់ឱកាសក្នុងការរកចំណូលបានពីការបង្កើតមាតិកាផ្សព្វផ្សាយនៅលើបណ្តាញសង្គមទាំងនោះផងដែរ។ ហើយនាពេលខាងមុខ ក្រសួងនឹងបន្តខិតខំសម្របសម្រួលបន្ថែមទៀត ដើម្បីឱ្យអ្នកបង្កើតមាតិកានៅបណ្តាញសង្គមហ្វេសប៊ុកនៅកម្ពុជាអាចរកចំណូលបាន។

យ៉ាងនេះក្តី លោកលើកទឹកចិត្តឱ្យអ្នកបង្កើតមាតិកាទាំងអស់ ប្រឹងបង្កើតមាតិកាឱ្យកាន់តែល្អ បម្រើដល់សង្គមជាតិ បរិស្ថាន មនុស្សជាតិ សេដ្ឋកិច្ច និងមានភាពទាក់ទាញដល់អ្នកស្តាប់ និងអ្នកទស្សនា ប៉ុន្តែកុំបង្កើតមាតិកាណាដែលធ្វើឱ្យមនុស្សភ័យខ្លាច បំផ្លាញបរិស្ថាន រំលេចនូវរូបភាពបែបសាហាវ ដែលមាតិកាទាំងនេះនឹងធ្វើឱ្យប៉ះពាល់ដល់អារម្មណ៍ទស្សនិកជន ហើយអាចនឹងមិនទទួលបានចំណូលផងដែរ។

ជាមួយគ្នានេះ អ្នកជំនាញនៅក្រុមហ៊ុន Tik Tok បានលើកឡើងថា បណ្ដាញសង្គមមិនជាការកម្សាន្ដតែប៉ុណ្ណោះទេ គឺយើងត្រូវមានចំណេះដឹង និងច្បាប់ ខណៈដែលព័ត៌មានខ្លះវាមិនត្រឹមត្រូវផងដែរ។ ក្រុមហ៊ុន Tik Tok ក៏កំពុងធ្វើការជាមួយដៃគូរផ្សេងៗ និងក្រសូងប្រៃសណីយ៍ ដែលមានមាតិការអ្វីបានចែករំលែកច្រើន ដែលប៉ះពាល់សិទ្ធិប្រទេសកម្ពុជាផងដែរ។

សូមបញ្ជាក់ថា គិតត្រឹមឆ្នាំ២០២៥នេះ ថ្នាល TikTok មានអ្នកប្រើប្រាស់ប្រមាណ ១.៩៣ពាន់លាននាក់ នៅទូទាំងពិភពលោក និងប្រមាណ១៦៥លាននាក់ នៅអាស៊ីអាគ្នេយ៍ ដោយក្នុងនោះ នៅកម្ពុជាយើងមានអ្នកប្រើប្រាស់ប្រមាណ ១០លាននាក់»៕