រដ្ឋមន្រ្តីក្រសួងព័ត៌មាន បួងសួងដល់អស់វត្ថុស័ក្តិសិទ្ធលើលោកសូមឱ្យរកឃើញឧទ្ធម្ភាគចក្រដែលបាត់ការទាក់ទង
ថ្ងៃទី ៖ 19-07-2024, ដោយ Dara007 , 143 Views
ពោធិ៍សាត់ : លោក នេត្រ ភក្រ្ដា រដ្ឋមន្រ្ដីក្រសួងព័ត៌មាន បានបង្ហោះនៅលើបណ្ដាញសង្គមហ្វេកប៊ុកថា រហូតមកដល់ថ្ងៃទី១៨ ខែកក្កដា នេះ គឺមានរយៈពេល ៧ ថ្ងៃហើយដែលក្រុមកម្លាំងសមត្ថកិច្ចបានតាមរុករកឧទ្ធម្ភាគចក្រ ដែលបានបាត់ការទាក់ទង នៅតំបន់ជួរភ្នំក្រវាញ កាលពីថ្ងៃទី១២ ខែកក្កដា ឆ្នាំ២០២៤។
លោករដ្ឋមន្រ្តីសូមបួងសួងដល់អស់វត្ថុស័ក្តិសិទ្ធលើលោកជាពិសេសបារមីដែលថែរក្សាភ្នំនៅតំបន់នោះសូមឱ្យបានរកឃើញឧទ្ធម្ភាគចក្រដែលបាត់ការទាក់ទងនោះ និងសូមឱ្យក្រុមជួយសង្គ្រោះមកពីក្រសួងការពារជាតិ រដ្ឋបាលខេត្តពោធិ៍សាត់ បានសេចក្តីសុខនិងជោគជ័យ។ តំបន់នោះស្ថិតក្នុងភូមិសាស្ត្រដែនជម្រកសត្វព្រៃភ្នំសំកុសដែលមានផ្ទៃដីទំហំ ៣៦២ ៣៨៤ហិកតា ស្ថិតក្នុងភូមិសាស្ត្រខេត្តពោធិ៍សាត់ បាត់ដំបង និងកោះកុង។ តំបន់នេះមានព្រៃក្រាស់ជាព្រៃស្តុកក្នុងតំបន់ជួរភ្នំក្រវ៉ាញដែលពិបាកនឹងរុកចូលក្នុងព្រោះមានជ្រលងភ្នំជ្រៅនិងព្រៃក្រាស់ ហើយនៅរដូវវស្សានេះ អាកាសធាតុភ្លៀងធ្លាក់ធ្វើឱ្យទឹកហូរខ្លាំងតាមអូរនិងស្ទឹង ជ្រលងភ្នំ ៕
|