លោក វង្ស សាវុទ្ធី អ្នកស្រាវជ្រាវនៃនាយកដ្ឋានស្រាវជ្រាវ បណ្តុះបណ្តាល និងផ្សព្វផ្សាយ បានបង្ហាញថា គ្រឿងបរិក្ខារសំខាន់ៗរបស់ព្រះសង្ឃដែលដាក់តាំងបង្ហាញនេះ មានអដ្ឋបរិក្ខារទាំង៨យ៉ាងតាមពុទ្ធប្បញ្ញត្តិ និងបរិក្ខារចោឡៈ ឬបរិក្ខាររាយរង ដែលជាបរិក្ខារចាំបាច់ផ្សេងទៀត សម្រួលដល់ការគង់នៅប្រចាំថ្ងៃរបស់ព្រះសង្ឃ។

អដ្ឋបរិក្ខារទាំង៨យ៉ាងនោះមានដូចជា៖ សង្ឃាដី ចីវរ ឬឧត្តរាសង្គ ស្បង់ ឬអន្តរវាសកៈ បាត្រ កាំបិតកោររួមបញ្ចូលទាំងស្រោម និងថ្មសំលៀង ម្ជុលរួមបញ្ចូលទាំងអំបោះ និងបំពង់ម្ជុល កាយពន្ធន ឬវត្ថពន្ធចង្កេះ និងធម្មក្រក(តម្រងទឹក)។ នៅមានបរិក្ខារចោឡៈ ឬបរិក្ខាររាយរងរួមមានដូចជា៖ សាដក ឬសំពត់ងូត វត្ថពន្ធទ្រូង ឬឧរពន្ធន ថង់ អង្ស័ក ផ្លិត មុងធុតង្គ ឆត្រ ឧបាហន(ស្បែកជើង)ជាដើម បរិក្ខាររាយរងនេះមានក៏បានអត់ក៏បាន ព្រោះពុំមានក្នុងពុទ្ធប្បញ្ញត្តិនោះទេ។

លោកក៏បញ្ជាក់ឡើងវិញដែរថា គោលបំណងនៃការស្រាវជ្រាវនឹងតាំងបង្ហាញនេះគឺដើម្បីឲ្យសិស្សនិស្សិត និងសាធារណជនបានស្គាល់ និងស្វែងយល់អំពីសង្ឃបរិក្ខារ ដែលមានលក្ខណៈត្រឹមត្រូវតាមព្រះវិន័យ ព្រោះថាគ្រឿងបរិក្ខារខ្លះ មានតែក្នុងព្រះវិន័យទេ ពុំមានប្រើប្រាស់ទៀតឡើយ ដោយសារបរិបទគង់នៅរបស់ព្រះសង្ឃសព្វថ្ងៃ សម្បូរបែបផង។

លោក ភួយ សាវឿត អនុប្រធានការិយាល័យសារមន្ទីរ និងបទដ្ឋានបេតិកភណ្ឌ ក៏បានលើកឡើងថា សារមន្ទីរព្រះនរោត្តមសីហនុ-អង្គរ តែងតែយកចិត្តទុកដាក់ថែរក្សាអភិរក្ស បុរាណវត្ថុ និងរៀបចំតាំងពិព័រណ៍បង្ហាញរាល់សមិទ្ធផលប្រវត្តិសាស្ត្រនានា ដែលទទួលបានពីការសិក្សាកំណាយស្រាវជ្រាវ ក្នុងគោលបំណងចង់បង្ហាញដល់សាធារណជនទូទៅ មកសិក្សាស្វែងយល់។ សារមន្ទីរព្រះនរោត្តមសីហនុ-អង្គរ ស្ថិតនៅក្នុងភូមិបឹងដូនប៉ា សង្កាត់ស្លក្រាម ក្រុងសៀមរាប ខេត្តសៀមរាប បើកជូនសាធារណជនទូទៅចូលទស្សនា ពីថ្ងៃអង្គារ ដល់ថ្ងៃអាទិត្យ ចាប់ពីម៉ោង៨:៣០នាទី ដល់ម៉ោង៤:០០នាទីល្ងាច៕